లండన్ నుండి తిరిగొచ్చాక ఆయన పని చెప్తాం: నాగం

By Srinivas

Published: Sunday, July 24, 2011, 14:07 [IST]

హైదరాబాద్: తెలంగాణ ప్రజా ప్రతినిధుల రాజీనామాలు ఆమోదించని సభాపతి నాదెండ్ల మనోహర్ లండన్ పర్యటన నుండి తిరిగి వచ్చాక ఆయన పని చెప్తామని తెలుగుదేశం పార్టీ బహిష్కృత శాసనసభ్యుడు నాగం జనార్దన్ రెడ్డి ఆదివారం అన్నారు. స్పీకరు తమ రాజీనామాలు ఆమోదించక పోవడంపై ఆయన తీవ్ర ఆగ్రహం వ్యక్తం చేశారు. మీడియా పాయింటు వద్దకు వెళ్లకుండా ముళ్లకంచె వేయడం పైన నాగం ఆగ్రహం వ్యక్తం చేశారు. ప్రజా ప్రతినిధులు మీడియా పాయింటు వద్ద మాట్లాడకుంటా చేయడం ద్వారా వారి గొంతు నొక్కే ప్రయత్నాలు స్పీకరు చేస్తున్నారని ఆరోపించారు. స్పీకరుకు ఆ స్థానంలో కూర్చునే హక్కు లేదన్నారు. ఆయనను వెంటనే డిస్మిస్ చేయాలని డిమాండ్ చేశారు.

తాము భావోద్వేగంతో రాజీనామాలు చేయలేదని తమ మూకుమ్మడి రాజీనామాలు చూసి ఆయనే భావోద్వేగానికి గురయ్యారని అన్నారు. రాజ్యాంగ హక్కులు కాలరాస్తున్న స్పీకరు లండన్ నుండి వచ్చాక ఆయన పని చెప్తామని హెచ్చరించారు. స్పీకరు నిర్ణయంపై సుప్రీం కోర్టుకు వెళతామని అన్నారు. అసెంబ్లీలో స్పీకరు పోలీసు రాజ్యాన్ని నడుపుతున్నారని ఆరోపించారు. రాజీనామాలు తిరస్కరించడం ద్వారా తమ క్యారెక్టర్ దెబ్బతీశారని ఆవేదన చెందారు. ఎపిలో పరిణామాలు పరిగణలోకి తీసుకొని పార్లమెంటు సభ్యులు ఢిల్లీలో స్పీకరు కార్యాలయం ఎదుట ఆందోళన చేసి రాజీనామాలు ఆమోదింప చేసుకోవాలని సూచించారు.

Published On July 24, 2011