రాజీనామా చేస్తే తెలంగాణ రాదని తేలింది: గండ్ర

By Srinivas

Published: Monday, July 25, 2011, 12:42 [IST]

హైదరాబాద్: తెలంగాణ ప్రాంత ప్రజాప్రతినిధులు రాజీనామాలు చేస్తే రెండు రోజుల్లో తెలంగాణ వస్తుందని చాలామంది చెప్పారని కానీ ఫలితం లేదని కాంగ్రెసు పార్టీ శాసనసభ్యుడు గండ్ర వెంకట రమణా రెడ్డి సోమవారం అసెంబ్లీ మీడియా పాయింటు వద్ద అన్నారు. ఈసారి ప్రతిపక్ష పార్టీల్లా రాజీనామాలపై తొందరపడమని చెప్పారు. అవసరమైతేనే రాజీనామాలు చేస్తామని చెప్పారు. లేదంటే అధిష్టానంపై ఒత్తిడికి ప్రయత్నాలు చేస్తామని చెప్పారు. తెలంగాణ విషయంలో జాగ్రత్తగా అడుగులు వేస్తామని చెప్పారు. తమ రాజీనామాలను సభాపతి నాదెండ్ల మనోహర్ తిరస్కరించడంపై కేంద్ర మంత్రి గులాం నబీ ఆజాద్‌తో ప్రస్తావిస్తామని చెప్పారు.

ఈసారి రాజీనామాలు చేయాల్సిన పరిస్థితి ఏర్పడితే అధిష్టానానికే లేఖలు ఇస్తామని చెప్పారు. తెలంగాణపై వ్యూహాత్మకంగా ముందుకు వెళతామని అన్నారు. మా ఎత్తుగడలన్నీ తెలంగాణ సాధన కోసమే అని చెప్పారు. సభాపతి నాదెండ్ల రాజీనామాలు తిరస్కరించడం వెనుక ముఖ్యమంత్రి కిరణ్ కుమార్ రెడ్డి ఒత్తిళ్లు ఉన్నట్టు ఎలాంటి ఆధారాలు లేవన్నారు. రాజీనామాలతో ఒత్తిడి పెరుగుతుందే తప్ప తెలంగాణ రాదని అర్థమై పోయిందన్నారు.

Published On July 25, 2011