సంగీత దర్శకుడు అనిల్ రెడ్డిని చంపింది ప్రియురాలే?

By Srinivas

Published: Monday, July 25, 2011, 12:06 [IST]

హైదరాబాద్: గత ఏప్రిల్ 21వ తేదిన మృతి చెందిన సంగీత దర్శకుడు అనీల్ రెడ్డిది సాధారణ మృతి కాదని హత్యే అని మరోసారిఅనుమానాలు వ్యక్తం అవుతున్నాయి. అనీల్ రెడ్డిని ఆయన ప్రియురాలు శాలినియే చంపినట్లుగా ఆరోపణలు మరోసారి గుప్పుమన్నాయి. శాలినిపై అనుమానాలు రేకెత్తిన నేపథ్యంలో అనీల్ రెడ్డి మృతదేహానికి మరోసారి పోస్టు మార్టం సోమవారం చేస్తున్నారు. ఇందులో హత్య అని తేలితే శాలినిని విచారించే అవకాశం ఉంది. ఏప్రిల్‌లో అనీల్ రెడ్డి మృతి చెందిన విషయం తెలిసిందే. అనీల్ మృతి చెందిన సమయంలోనే అనీల్ తమ్ముడు ప్రకాశ్ రెడ్డి, బంధువులు ఆతని ప్రియురాలు శాలినిపై అనుమానాలు వ్యక్తం చేశారు. అనీల్‌కు వచ్చిన ఎస్సెమ్మెస్‌ల ఆధారంగా శాలినియే హత్య చేసిందని ప్రకాశ్ రెడ్డి పోలీసులతో చెప్పారు.

అయితే అనీల్‌ది హత్య కాదని సాధారణ మృతియే అని శాలిని చెప్పింది. అయితే ఇటీవల వచ్చిన పోస్టుమార్టంలో అనీల్ తలపై దెబ్బలు ఉన్నాయని తేలింది. అవి బయటకు కనిపించకుండా లోపల మాత్రమే ఉన్నాయని తేలడంతో బంధువులు మరోసారి తమకు న్యాయం చేయాలని డిజికి విన్నవించుకున్నారు. అనీల్ తలపై నాలుగు ప్రాంతాలలో తీవ్రమైన దెబ్బలు ఉన్నట్లుగా తెలుస్తోంది. మృతదేహాన్ని మొదట అపోలో హాస్పిటల్ తీసుకు వెళ్లారు. అక్కడ అనీల్ తలకు గాయాలు అయినట్లు తేలినట్లుగా తెలుస్తోంది. దీంతో అనీల్ మృతదేహానికి వైద్య బృందం ఫోరెనిక్స్ పరీక్షలు సోమవారం మరోసారి చేయనుంది. ఈ రోజు అనీల్‌ది హత్యనా, సాధారణ మృతియా అనే మిస్టరీ తేలనుంది!

Published On July 25, 2011