కర్నాటక సంక్షోభానికి తెర, రాజీనామాకు యెడ్డీ సిద్ధం?

By Srinivas

Published: Thursday, July 28, 2011, 16:54 [IST]

బెంగుళూరు: కర్నాటక ముఖ్యమంత్రి యడ్యూరప్ప ఎట్టకేలకు తమ పార్టీ అధిష్టానం ఒత్తిడికి తలొగ్గారు. పార్టీ సూచనల మేరకు రాజీనామా చేసేందుకు సిద్ధంగా ఉన్నట్లు ప్రకటించారు. అయితే తన రాజీనామాకు యెడ్డీ రెండు ప్రతిపాదనలు అధిష్టానం ముందు ఉంచినట్లుగా తెలుస్తోంది. తాను సూచించిన వ్యక్తికి ముఖ్యమంత్రి పీఠం అప్పగించాలనేది ఆయన మొదటి ప్రతిపాదన కాగా, తనకు పార్టీలో మంచి స్థానం కేటాయించాలనేది ఆయన రెండో ప్రతిపాదనగా తెలుస్తోంది. యెడ్డీ రాజీనామాకు సిద్ధ పడటంతో చివరి నిమిషంలో ఆయన ఏర్పాటు చేయాలనుకున్న మంత్రివర్గం సమావేశం రద్దయింది. కాగా లోకాయుక్త ఆరోపణల నేపథ్యంలో యెడ్యూరప్పను ముఖ్యమంత్రి పీఠం నుండి బిజెపి అధిష్టానం భావించిన విషయం తెలిసిందే. అయితే అందుకు యెడ్డీ ససేమీరా అన్నారు. తాను తప్పుకుంటే సమస్య అవుతుందని అధిష్టానానికి చెప్పారు.

ఓ సమయంలో ఆయన అధిష్టానం మాటలు బేఖాతరు చేస్తూ రాజీనామా చేసే ప్రసక్తే లేదని ఖచ్చితంగా చెప్పారు. దీంతో చేసేది లేక అధిష్టానం యెడ్డీకి ఆల్టిమేటం జారీ చేసింది. పన్నెండు గంటలలోగా రాజీనామా చేయాలని ఆల్టిమేటం జారీ చేసింది. యెడ్డీ కూడా తన పదవిని నిలబెట్టుకోవడానికి పలువురు ఎమ్మెల్యేలు, మంత్రులతో రహస్య సమావేశం నిర్వహించారు. యెడ్డీ సమావేశానికి ఎవరూ హాజరు కావద్దని అధిష్టానం సూచించడంతో ఎక్కువ మంది నేతలు హాజరు కాలేదు. సుమారు 30 మంది ఎమ్మెల్యేలు మాత్రమే ఆయన రహస్య భేటీలో పాల్గొన్నారు. అయితే ఎట్టకేలకు యెడ్డీ రాజీనామాకు అంగీకరించడంతో పార్టీ అంతర్గత సంక్షోభానికి తెరపడింది.

Published On July 28, 2011