తెలంగాణపై యనమల కామెంట్స్: చంద్రబాబు క్లాస్

హైదరాబాద్: తెలుగుదేశం పార్టీ సీనియర్ నాయకుడు, మాజీ మంత్రి యనమల రామకృష్ణుడికి ఆ పార్టీ అధినేత నారా చంద్రబాబు నాయుడు శుక్రవారం క్లాస్ పీకినట్లుగా తెలుస్తోంది. శుక్రవారం ఆయన చంద్రబాబును కలిసిన అనంతరం విలేకరులతో మాట్లాడారు. తన వ్యాఖ్యలను వక్రీకరించి తెలంగాణ రాష్ట్ర సమితి రాజకీయ లబ్ధి పొందేందుకు ప్రయత్నాలు చేస్తోందని ఆయన ఆరోపించారు. టిఆర్ఎస్‌కు తెలంగాణపై చిత్తశుద్ధి ఉంటే పోరాడి తెలంగాణ సాధించుకోవాలన్నారు.

కానీ ఇలాంటి వక్రీకరణలకు దిగజారవద్దని కోరారు. తెలంగాణ ప్రాంత ప్రజాప్రతినిధులు తన వ్యాఖ్యలను రాజకీయం చేయడం సరికాదన్నారు. గత మహానాడులో చేసిన తీర్మానాన్ని మాత్రమే తాను చెప్పానని అన్నారు. ఆ విషయంపై తమ అధినేతకు తాను వివరణ ఇవ్వలేదన్నారు. తాను ఇంచార్జిగా ఉన్న విజయనగరం జిల్లాపై చర్చించడానికి చంద్రబాబును కలిసినట్లు చెప్పారు. తన వ్యాఖ్యలను ఎవరూ తప్పుగా అర్థం చేసుకోవాల్సిన అవసరం లేదన్నారు.

అనవసరంగా టిడిపిని వివాదంలోకి లాగే ప్రయత్నాలు టిఆర్ఎస్ చేస్తోందని ఆరోపించారు. కాగా ప్రత్యేక తెలంగాణ విషయంలో 2011 మహానాడులో టిడిపి చేసిన తీర్మానానికి పార్టీ కట్టుబడి ఉందని ఆయన అన్నారు. 2011 తీర్మానంలో తెలంగాణ అంశాన్ని కేంద్రానికి అప్పగిస్తూ తీర్మానం చేశారు. ఈ వ్యాఖ్యలు తీవ్ర దుమారాన్నే లేపాయి. అయితే యనమల చంద్రబాబును కలిసి వివరణ ఇచ్చుకున్నారని, చంద్రబాబు ఆయనను మందలించారనే వాదనలు కూడా వినిపిస్తున్నాయి.

English summary

TDP chief Chandrababu Naidu took class to Yanamala Ramakrishnudu towards his comments on Telangana.