వారు చంద్రబాబుకు బానిసలు: నాగం ధ్వజం

By Srinivas

Published: Friday, July 29, 2011, 16:22 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడు మాజీ మంత్రి, సీనియర్ నేత యనమల రామకృష్ణ వ్యాఖ్యలను సమర్థించినట్లుగా మాట్లాడారని ఆ పార్టీ బహిష్కృత శాసనసభ్యుడు నాగం జనార్దన్ రెడ్డి శుక్రవారం విమర్శించారు. తెలంగాణ అంశంపై తుది నిర్ణయం నాదే అని చంద్రబాబు ప్రకటించాక ఇక తెలంగాణ తెలుగుదేశం ఫోరం ఎందుకని ఆయన ప్రశ్నించారు. చంద్రబాబు తన వ్యాఖ్యల ద్వారా ఫోరం ఉనికినే దెబ్బతీశారని అన్నారు. టిటిడిపి నేతలు ఫోరం రద్దు చేసుకోవాలని డిమాండ్ చేశారు. తన వ్యాఖ్యల ద్వారా చంద్రబాబు సమైక్య వాది అని స్పష్టం అయిందని ఇకనైనా టిటిడిపి నేతలు టిడిపిని వీడాలన్నారు. ఇంకా ఎంతకాలం బానిస బతుకులు బతుకుతారని ప్రశ్నించారు. వెంటనే బానిస సంకెళ్లను తెంచుకొని బయటకు రావాలని సూచించారు.

టిటిడిపి నేతలకు వెన్నెముక లేదా అని అడిగారు. తెలంగాణ అంశాన్ని నిత్యం కేంద్రంపై నెట్టడం బాబుకు సరికాదన్నారు. మొదట తన వైఖరి చెప్పిన తర్వాత కేంద్రాన్ని ప్రశ్నించాలని సూచించారు. తమ నియోజకవర్గాల్లో ఇంచార్జిలను నియమిస్తే భయపడేది లేదన్నారు. తెలంగాణలో డబ్బులతో రాజకీయం చేయలేరని హెచ్చరించారు. టిడిపి, కాంగ్రెసు ప్రజాప్రతినిధులు రాజీనామా చేయకుంటే వారికి రాజకీయ సమాధి తప్పదన్నారు. టిటిడిపి నేతల తీరు చూస్తుంటే వారికి తెలంగాణ తేవాలన్న ఆకాంక్ష ఏమీ లేనట్లుగా కనిపిస్తోందన్నారు. తెలుగు వారి ఆత్మ గౌరవం కోసం పుట్టిన టిడిపికి తెలంగాణ ప్రజల ఆత్మఘోష పట్టదా అని ప్రశ్నించారు.

Published On July 29, 2011