గాలి జనార్దన్ రెడ్డితో జగన్‌కు లింకులు: నారాయణ

హైదరాబాద్: వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి చెందిన సంస్థలకు కర్నాటక మంత్రి గాలి జనార్దన్ రెడ్డితో సంబంధాలు ఉన్నాయని సిపిఐ రాష్ట్ర కార్యదర్శి నారాయణ శుక్రవారం ఆరోపించారు. వైయస్ జగన్ విషయంలో సిబిఐ దర్యాఫ్తులో తీగ లాగితే డొంక కదులుతుందని అన్నారు. తెలంగాణ అంశం విషయంలో కేంద్ర మంత్రి చిదంబరం చెప్పేవన్నీ అబద్దాలే అని అన్నారు. చిదంబరానిది నాలికా లేక తాటిమట్టా అని ఆయన ప్రశ్నించారు. తెలంగాణ విషయంలో భారతీయ జనతా పార్టీ తప్ప రాష్ట్రంలోని మిగిలిన పార్టీలన్నీ రెండుగా చీలిపోయాయని వ్యాఖ్యానించిన చిదంబరంపై ఆగ్రహం వ్యక్తం చేశారు.

అసలు చీలిపోయింది కాంగ్రెసు పార్టీయే అని అన్నారు. తెలంగాణ అంశంపై కాంగ్రెసు పార్టీ ఏమీ తేల్చకుండా నాన్చుతుందన్నారు. తెలంగాణ ప్రాంత కాంగ్రెసు ప్రజాప్రతినిధులు లోపల అధిష్టానం కాళ్లు పట్టుకొని బయటకు వచ్చి మీసాలు మెలేస్తున్నారని ధ్వజమెత్తారు. కేంద్రం తెలంగాణ అంశాన్ని వెంటనే తేల్చాలని సూచించారు. రాష్ట్రంలో ఇంత సంక్షోభం ఉన్న కేంద్రం చర్చల పేరుతో కాలాయాపన చేయడం సరికాదని తప్పుబట్టారు.

English summary

CPI state secretary Narayana accused that YSR Congress party president YS Jaganmohan Reddy companies have links with Karnataka minister Gali Janardhan Reddy.