లోకాయుక్తపై బిజెపి నేత వెంకయ్యనాయుడు అసంతృప్తి

బెంగళూరు: లోకాయుక్తలో కొన్ని లోపాలు ఉన్నాయని భారతీయ జనతా పార్టీ సీనియర్ నేత వెంకయ్య నాయుడు శుక్రవారం అభిప్రాయపడ్డారు. ఇటీవల కర్నాటక లోకాయుక్త సంతోష్ హెగ్డే ముఖ్యమంత్రి యడ్యూరప్ప మైనింగ్‌లో ఘోర అవినీతికి పాల్పడ్డారని నివేదిక ఇచ్చిన విషయం తెలిసిందే. ఇది తీవ్ర ప్రకంపనలు సృష్టించి చివరకు కర్నాటకలో మార్పిడికి తెర లేపింది. ఈ నేపథ్యంలో వెంకయ్య నాయుడు శుక్రవారం బెంగళూరు వచ్చారు. ఓ ఛానల్ ముఖాముఖిలో మాట్లాడారు. లోకాయుక్తలోనూ కొన్ని లోపాలు ఉన్నాయని చెప్పారు. యడ్డీపైన నివేదిక మాత్రమే వచ్చిందన్నారు. అందుకు నైతిక బాధ్యత వహిస్తూ ఆయన రాజీనామా చేస్తున్నారని అన్నారు.

దీనిపై కాంగ్రెసు పార్టీ నీతిమాలిన రాజకీయాలు చేస్తోందని ఆరోపించారు. నాయకత్వ మార్పు అనేది తమ పార్టీ అంతర్గత విషయం అని చెప్పారు. ఈ నెల 31వ తారీఖున యడ్యూరప్ప రాజీనామా చేస్తారని అన్నారు. రాజీనామా చేయడం కోసం యడ్యూరప్ప కొన్ని డిమాండ్లు పెట్టారని వస్తున్న వార్తల్లో నిజం లేదన్నారు. ఆయనతో ఎలాంటి షరతులు లేకుండా రాజీనామా చేయిస్తున్నామని చెప్పారు. ఆగస్టు 1న కొత్త ప్రభుత్వం ఏర్పడుతుందని చెప్పారు. అందరి శాసనసభ్యుల అభిప్రాయాన్ని పరిగణలోకి తీసుకొని యడ్డీ వారసుడిని ఎంపిక చేస్తామని చెప్పారు. అవినీతిపై రాజీపడే ప్రసక్తి లేదన్నారు.

English summary

BJP senior leader Venkaiah Naidu unhappy with Lokayukta. He said in Bangalore that the Yeddyurappa will resign on 31st, Next government will on 1st of August.