కర్నాటక కొత్త ముఖ్యమంత్రిగా సదానంద గౌడ?

బెంగళూరు: కర్నాటక కొత్త ముఖ్యమంత్రిగా సదానంద గౌడ పేరు ప్రముఖంగా వినిపిస్తోంది. ముఖ్యమంత్రి యడ్యూరప్ప సైతం ఆయన పేరును ప్రతిపాదించినట్లుగా తెలుస్తోంది. భారతీయ జనతా పార్టీ అధిష్టాం కూడా ఆయన వైపు మొగ్గు చూపుతున్నట్లుగా సమాచారం. తనను పదవి నుండి దింపితే రాష్ట్ర అధ్యక్ష పదవి ఇవ్వాల్సిందిగా యడ్యూరప్ప అధిష్టానానికి చెబుతున్నట్లుగా సమాచారం. ఆదివారం రాజ్ నాథ్ సింగ్, అరుణ్ జైట్లీలతో యడ్డీ సమావేశమై సిఎం పీఠం కోసం సదానందను ప్రతిపాదించి, తనకు అధ్యక్ష పీఠం ఇవ్వాలని వారితో చర్చిస్తున్నట్లుగా తెలుస్తోంది.

కాగా అంతకుముందు శాసనసభ్యుల అభిప్రాయం మేరకే కర్నాటక కొత్త ముఖ్యమంత్రి ఎంపిక జరుగుతుందని పార్టీ సీనియర్ నేత వెంకయ్య నాయుడు బెంగుళూరులో విలేకరులతో మాట్లాడుతూ స్పష్టం చేశారు. ముఖ్యమంత్రి యడ్యూరప్ప రాజీనామా చేస్తానని ప్రకటించడం శుభ పరిణామం అని ఆయన అన్నారు. సాయంత్రం బిజెఎల్పీ సమావేశమై కొత్త ముఖ్యమంత్రిని ఎన్నుకునే అవకాశం ఉంది. ఈశ్వరప్ప, జగదీష్ షెట్టార్ తదితరుల పేర్లు ముఖ్యమంత్రికి పరిశీలించినప్పటికీ దాదాపు సదానంద గౌడనే వరించనుందని పలువురు అభిప్రాయపడుతున్నారు.

English summary

Karnataka CM Yeddyurappa was proposed Sadananda Gouda name as new CM.