యడ్డీ కొత్త పార్టీపై ఊహాగానాలు: గడ్కరీకి రాజీనామా

By Srinivas

Published: Sunday, July 31, 2011, 9:48 [IST]

బెంగళూరు: కర్నాటక ముఖ్యమంత్రి యడ్యూరప్ప కొత్త పార్టీ పెడతారనే ఊహాగానాలు కర్నాటకలో బాగా వినిపిస్తున్నాయి. భారతీయ జనతా పార్టీ అధిష్టానం తనను తప్పించేందుకు ప్రయత్నించిన నేపథ్యంలో ఆయన కర్నాటక జనతా పార్టీ పేరుతో కొత్త పార్టీ పెట్టేందుకు సిద్ధపడ్డట్లుగా ఊహాగానాలు జోరుగా వినిపిస్తున్నాయి. ఆయన ఆదివారం ఉదయం తన సామాజిక వర్గం బలిజ వర్గానికి చెందిన పలువురు ప్రతినిధులతో సమావేశం నిర్వహించనున్నట్టు తెలుస్తోంది. ఈ సమావేశంలో ఆయన వారితో చర్చించి కొత్త పార్టీపై నిర్ణయం తీసుకుంటారని పలువురు అనుమానాలు వ్యక్తం చేస్తున్నారు. అధిష్టానం రాజీనామాకు పట్టుబట్టిన సమయంలో తన సామాజిక వర్గానికి చెందిన నేతలతో సమావేశం కావడం కొత్త పార్టీ కోసమే అని పలువురు అంటున్నారు.

కర్నాటకలో యడ్యూరప్ప సామాజిక వర్గం సుమారు వంద నియోజకవర్గాలను ప్రభావితం చేస్తుంది. దీనిని దృష్టిలో ఉంచుకొనే యడ్డీ అధిష్టానంకు ఝలక్ ఇచ్చేందుకు కొత్త పార్టీ ప్రతిపాదనపై దృష్టి పెట్టినట్లుగా తెలుస్తోంది. కాగా యడ్డీ ఇప్పటికే పార్టీ జాతీయ అధ్యక్షుడు నితిన్ గడ్కరీకి తన రాజీనామా లేఖను పంపించారు. లేఖ అందినట్లు బిజెపి ఆధిష్టానం సైతం ధృవీకరించింది. సాయంత్రం 3.30 గంటలకు గవర్నర్‌కు రాజీనామాను సమర్పించే అవకాశం ఉంది. అంతా సవ్యంగా జరిగితే సాయంత్రం బిజెఎల్పీ సమావేశం నిర్వహిస్తారు. అందులో కొత్త ముఖ్యమంత్రిని ఎన్నుకునే అవకాశం ఉంది.

Published On July 31, 2011