తెలంగాణపై అడిగితే సమాధానమిస్తా: చిదంబరం

By Pratap

Published: Monday, August 1, 2011, 17:48 [IST]

న్యూఢిల్లీ: తెలంగాణ అంశంపై ఆంధ్రప్రదేశ్ పార్లమెంటు సభ్యులతో చర్చలు జరుపుతున్నామని చెప్పారు. వారితో జరిగే చర్చలు ఫలిస్తాయనే ఆశాభావం వ్యక్తం చేశారు. కేంద్ర మంత్రి, ఎపి రాష్ట్ర వ్యవహారాల ఇంచార్జి గులాం నబీ ఆజాద్ వారితో చర్చలు జరుపుతున్నారన్నారు. అతిత్వరలో పరిష్కారం లభిస్తుందన్నారు. ప్రతిపక్షాలు తెలంగాణ అంశాన్ని పార్లమెంటులో లేవనెత్తితే అక్కడే సమాధానం చెబుతామని అన్నారు. ప్రతిపక్షాలు ప్రశ్నిస్తే సమాధానం చెప్పడానికి తాను సిద్ధంగా ఉన్నానని చెప్పారు. 14ఎఫ్‌పై శాసనసభ తీర్మానం మళ్లీ రావాల్సిందేనని ఆయన అన్నారు. 2010లో తీర్మానం చేసి పంపినప్పటికీ తాజా తీర్మానం అవసరమని ఆయన అన్నారు.

కాగా, తెలంగాణపై బిజెపి సావధాన తీర్మానాన్ని ప్రతిపాదించాలని నిర్ణయించింది. ఈ విషయాన్ని బిజెపి నాయకురాలు సుష్మా స్వరాజ్ సోమవారం మీడియా ప్రతినిధులతో చెప్పారు. ఇందుకు ఇప్పటికే తాము నోటీసు ఇచ్చినట్లు ఆమె తెలిపారు. తెలంగాణ కాంగ్రెసు పార్లమెంటు సభ్యుల రాజీనామాలపై కూడా పార్లమెంటులో చర్చ జరగాల్సిందేనని ఆమె అన్నారు.

Published On August 1, 2011