ఒబామాకు ఊరట, రుణ పరిమితి ఒప్పందం

By Pratap

Published: Monday, August 1, 2011, 10:24 [IST]

వాషింగ్టన్: అమెరికా అధ్యక్షుడు బరాక్ ఒబామాకు ఊరట లభించింది. దివాళా తీసే పరిస్థితి నుంచి ఉభయసభల సభ్యులు ఆయనను బయటపడేశారు. రుణ పరిమితి పెంచేందుకు ఒప్పందం కుదిరినట్లు అమెరికా అధ్యక్షుడు ఒబామా ప్రకటించారు. లోటును భర్తీ చేసేందుకు ఆయనకు అవకాశం చిక్కింది. ఇరు పార్టీల నాయకులు ఉభయ సభలకు చెందిన సభ్యులు ఒప్పందం కుదుర్చుకున్నట్లు ఆయన తెలిపారు. వచ్చే పదేళ్లలో ట్రిలియన్ డాలర్ల వ్యయంపై కోత విధించడం ఒప్పందంలో మొదటి భాగమని ఆయన చెప్పారు. రుణ పరిమితి పెంపు వల్ల దివాళా నంచి బయటపడుతామని, బిల్లులు చెల్లిస్తామని, బాధ్యతాయుతంగా లోటును పూడ్చడానికి అవకాశం కల్పిస్తుందని ఆయన అన్నారు.

అమెరికా దివాళా అంచున నిలవడంతో గతవారమంతా అంతంతమాత్రంగా సాగిన ఆసియా మార్కెట్లు సోమవారం ఉత్సాహంగా పరుగులు తీస్తున్నాయి. ఒక్క షాంఘై తప్ప పలు మార్కెట్లు భారీ లాభాలతో ట్రేడవుతున్నాయి. అమెరికా రుణ పరిమితి పెంచేందుకు ఒప్పందం ఖరారైనట్లు అధ్యక్షుడు ఒబామా ప్రకటించారు. దాంతో మార్కెట్లు లాభాలబాటలో పరుగులు తీస్తున్నాయి. ఈ సస్పెన్షుకు తెర తీయడంతో మార్కెట్లు పుంజుకున్నాయి.

Published On August 1, 2011