చంద్రబాబుకు వయసై పోయింది: రాములమ్మ

By Srinivas

Published: Monday, August 1, 2011, 17:39 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడుకు వయసు అయిపోయిందని తెలంగాణ రాష్ట్ర సమితి మెదక్ పార్లమెంటు సభ్యురాలు విజయశాంతి సోమవారం అన్నారు. తెలంగాణ విషయం ప్రస్తావనకు వచ్చినప్పుడు రెండు ప్రాంతాలు తనకు సమానమని చెబుతూ రెండు కళ్ల సిద్దాంతాన్ని ప్రతిపాదిస్తున్న చంద్రబాబు తెలంగాణ తెలుగుదేశం పార్టీ అధ్యక్షుడిని ప్రకటించాలని డిమాండ్ చేశారు. తెలంగాణ ప్రాంత పార్లమెంటు సభ్యులు సమావేశాలకు వెళ్లకుండా ఉండటంతో సరిపెట్టడం సరికాదన్నారు. వారు వెంటనే తమ రాజీనామాలు ఆమోదింప జేసుకోవాలని సూచించారు.

తెలంగాణ ప్రాంతానికి చెందిన మంత్రులు ఇళ్ల వద్ద ఫైళ్లపై సంతకాలు పెట్టడం సరికాదన్నారు. కాంగ్రెసు అధినాయకత్వం సైతం తెలంగాణ ఇస్తుందా లేదా స్పష్టంగా ప్రకటించాలని డిమాండ్ చేశారు. కాగా తెలుగుదేశం, కాంగ్రెసు పార్టీ తెలంగాణ ప్రజాప్రతినిధులు రాజీనామాలు కాదని వారు రాజీడ్రామాలు ఆడుతున్నారని సిద్దిపేట శాసనసభ్యుడు హరీష్ రావు వరంగల్‌లో అన్నారు. కేంద్రం వెంటనే తెలంగాణ బిల్లు పార్లమెంటులో పెట్టాలని డిమాండ్ చేశారు. తెలంగాణ కోసం ప్రజాప్రతినిధులు అందరూ రాజీనామాలు చేయాలని డిమాండ్ చేశారు.

Published On August 1, 2011