కర్ణాటక ముఖ్యమంత్రి ఎంపికలో వీడని చిక్కులు

By Pratap

Published: Tuesday, August 2, 2011, 10:07 [IST]

బెంగుళూరు: అతి కష్టం మీద యడ్యూరప్ప చేత ముఖ్యమంత్రి పదవికి రాజీనామా చేయించిన బిజెపి అధిష్టానం కొత్త నేత ఎంపికలో తీవ్రమైన ఇబ్బందులను ఎదుర్కుంటోంది. ఇటు యడ్యూరప్ప, అటు అనంత కుమార్ పట్టు వీడకుండా తమ వర్గాలకు చెందిన శాసనసభ్యులతో శిబిరాలు నిర్వహిస్తున్నారు. శాసనసభ్యులతో విడివిడిగా పార్టీ పరిశీలకులు రాజ్‌నాథ్ సింగ్, అరుణ్ జైట్లీ చర్చలు జరిపినా ఫలితం కనిపించలేదు. లోకసభ్యుడు సదానంద గౌడకు ముఖ్యమంత్రి పదవి ఇవ్వాలని యడ్యూరప్ప పట్టుబడుతుండగా, తనకే ఆ పదవి కావాలంటూ అనంత కుమార్ భీష్మించుకున్నారు. దీంతో బిజెపి శాసనసభా పక్ష నేత ఎంపిక వాయిదా పడుతూ వస్తోంది.

అనంతకుమార్‌తో పాటు బిజెపి రాష్ట్రాధ్యక్షుడు ఈశ్వరప్ప కూడా సదానంద గౌడను వ్యతిరేకిస్తున్నారు. మంత్రి జగదీష్ షెట్టర్ తాను ముఖ్యమంత్రి పదవికి రేసులో ఉన్నానని ప్రకటించారు. తనకు 56 మంది శాసనసభ్యుల మద్దతు ఉందని, అది 69కి పెరుగుతుందని ఆయన చెబుతున్నారు. యడ్యూరప్ప మాదిరిగానే జగదీష్ షెట్టర్ బలమైన లింగాయత్ వర్గానికి చెందినవారు. అయితే, ఆయనను యడ్యూరప్ప వ్యతిరేకిస్తున్నారు. రెండు వర్గాలు తీవ్రంగా పోటీ పడుతున్న తరుణంలో మధ్యేమార్గంగా ఆచార్య పేరు ముందుకు వస్తోంది. కాగా, ఏకాభిప్రాయ సాధన ద్వారా గానీ రహస్య బ్యాలెట్ ద్వారా గానీ శాసనసభా పక్ష నేతను ఎంపిక చేసే విషయంపై ఆలోచన చేస్తున్నట్లు రాజ్‌నాథ్ సింగ్ చెప్పారు.

Published On August 2, 2011