తెలంగాణ టీచర్లకు చంద్రబాబు నాయుడు హామీ

హైదరాబాద్: తెలంగాణ ఉపాధ్యాయ ఐక్య కార్యాచరణ సమితి చేపడుతున్న ఒక్కరోజు దీక్షకు తెలుగుదేశం పార్టీ తరఫున ఓ ప్రతినిధిని పంపిస్తామని ఆ పార్టీ అధ్యక్షుడు నారా చంద్రబాబు నాయుడు హామీ ఇచ్చారు. ప్రత్యేక తెలంగాణ రాష్ట్రం కోసం తెలంగాణ ఉద్యోగ సంఘాలు ఈ నెల 17న చేపడుతన్న సకల జనుల సమ్మెకు సంఘీభావంగా తెలంగాణ ఉపాధ్యాయ సంఘాలు బుధవారం ఇందిరాపార్కు వద్ద ఒక్కరోజు దీక్షను చేపడుతోంది. ఈ సందర్భంగా టిడిపి మద్దతు కోరడానికి జెఏసి నేతలు చంద్రబాబును కలిశారు. చంద్రబాబును కలిసిన అనంతరం జెఏసి నేత రవీందర్ విలేకరులతో మాట్లాడారు. ఈ దీక్షలో ఇరవై ఐదు వరకు ఉపాధ్యాయ సంఘాలు పాల్గొంటాయని చెప్పారు. వేలాది ఉపాధ్యాయులు పాల్గొంటారని చెప్పారు.

తమ సంఘీభావ దీక్షకు మద్దతు ఇవ్వాలని చంద్రబాబును కోరామని అందుకు ఆయన సానుకూలంగా స్పందించారని చెప్పారు. టిడిపి తరఫున ఒక ప్రతినిధిని పంపిస్తానని చెప్పారని అన్నారు. బుధవారం ఉదయం 10 గంటలకు దీక్ష ప్రారంభమై సాయంత్రం 5 గంటలకు ముగుస్తుందని చెప్పారు. తమ దీక్షకు తెలంగాణకు చెందిన అన్ని జెఏసి నాయకులను ఆహ్వానించామని అన్నారు. కేంద్రం తెలంగాణపై ఇప్పటికే చాలా ఆలస్యం చేసిందని అన్నారు. వెంటనే తెలంగాణపై స్పష్టమైన ప్రకటన చేయాలని కోరారు.

English summary

Telugudesam chief Nara Chandrababu Naidu promised Telangana teachers to sent one candidate from TDP for their fast.