కొత్త ముఖ్యమంత్రి ఎన్నిక ఏకగ్రీవమే: యడ్యూరప్ప

By Srinivas

Published: Tuesday, August 2, 2011, 15:26 [IST]

బెంగళూరు: తమ పార్టీ అధిష్టానంపై తనకు మంచి అభిప్రాయం ఉందని కర్నాటక మాజీ ముఖ్యమంత్రి, భారతీయ జనతా పార్టీ సీనియర్ నేత యడ్యూరప్ప మంగళవారం మీడియాతో అన్నారు. త్వరలో ముఖ్యమంత్రిని ఏకగ్రీవంగా ఎన్నుకుంటామని చెప్పారు. పార్టీలో మెజార్టీ శాసనసభ్యుల నిర్ణయంతోనే ముఖ్యమంత్రి ఎన్నిక ఉంటుందని చెప్పారు. దైవాన్ని బాగా నమ్మే యడ్యూరప్ప ముఖ్యమంత్రి పదవికి రాజీనామా చేసిన అనంతరం టముకూరులోని సిద్దగంగ పీఠాధిపతిని దర్శించుకునేందుకు వెళ్లారు. ఆదివారం రాజీనామాకు ముందు సైతం ఆయన దేవుడిని దర్శించుకున్నారు. అంతేకాదు దుర్ముహూర్తం వెళ్లాకే తన రాజీనామాను గవర్నర్ భరద్వాజ్‌కు సమర్పించడం విశేషం. లోకాయుక్త సంతోష్ హెగ్డే నివేదికపై యడ్యూరప్ప హోకోర్టులో రిపిటిషన్ దాఖలు చేశారు.

కాగా మంగళవారం సాయంత్రం బిజెపి సీనియర్ నేత, మాజీ మంత్రి అరుణ్ జైట్లీ బెంగళూరు రానున్నారు. బుధవారం జరిగే బిజెఎల్పీ సమావేశంలో కొత్త ముఖ్యమంత్రిని ఎన్నుకుంటారు. యడ్యూరప్ప పట్టు మేరకు పార్లమెంటు సభ్యుడు సదానంద గౌడ పేరు దాదాపు ఖరారయినట్లుగా తెలుస్తోంది. సదానంద గౌడ వివాద రహితుడు కావడం, అందరితో కలుపుకు పోయే వ్యక్తి కావడం వలన బిజెపి యడ్యూరప్ప డిమాండుకు తలొగ్గినట్లుగా తెలుస్తోంది. యడ్యూరప్ప వ్యతిరేక వర్గం జగదీష్ షెట్టార్, అనంత కుమార్‌ల నుండి ఏమైనా ఒత్తిళ్లు ఎదురైతే ఉపముఖ్యమంత్రి పీఠంపై కూర్చుండ బెట్టాలని చూస్తున్నట్లుగా సమాచారం.

Published On August 2, 2011