మా తెలుగుతల్లిని చించేయండి: హరీష్ రావు

హైదరాబాద్: పాఠ్య పుస్తకాలలో నుండి మా తెలుగు తల్లి పుటను చించి వేయాలని తెలంగాణ రాష్ట్ర సమితి సిద్దిపేట శాసనసభ్యుడు హరీష్ రావు బుధవారం టీచర్ల ఒక్కరోజు దీక్షలో సూచించారు. పాఠ్య పుస్తకాలలో నుండి ఆ గేయాన్ని చించి వేయడం ఒక ఉద్యమంలా చేయాలని పిలుపునిచ్చారు. తెలంగాణ ప్రజా ప్రతినిధులు అందరూ మరోసారి రాజీనామాలు చేయాలని సూచించారు. రెండోసారి రాజీనామాలు చేస్తేనే ఢిల్లీ నేతలు ఉక్కిరి బిక్కిరి అవుతారని చెప్పారు. ముఖ్యమంత్రి కిరణ్ కుమార్ రెడ్డి, స్పీకర్ నాదెండ్ల మనోహర్ రాజీనామాలు తిరస్కరించడంలో కుట్ర చేసినప్పటికీ మరోసారి రాజీనామాలు చేసే విషయంలో తెలంగాణ నేతలకు చిత్తశుద్ధి లేదన్నారు.

అందరూ రాజీనామాలు చేస్తేనే సకల జనుల సమ్మెకు న్యాయం జరుగుతుందన్నారు. 14ఎఫ్ రద్దు చేసే వరకు పరీక్షలు నిర్వహించ వద్దని ప్రభుత్వాన్ని హెచ్చరించారు. 14ఎఫ్ పై అసెంబ్లీలో తీర్మానం జరిగి 16 నెలలు గడుస్తున్నా ఎలాంటి పురోగతి లేదని విమర్శించారు. రద్దు తర్వాతే పరీక్షలు నిర్వహించాలన్నారు. తెలంగాణ ప్రజల ఉద్యోగాలు కొల్లగొట్టే అధికారం సీమాంధ్రులకు ఎక్కడిదని తెలుగుదేశం పార్టీ బహిష్కృత ఎమ్మెల్యే నాగం జనార్దన్ రెడ్డి ప్రశ్నించారు.

English summary

TRS MLA Harish Rao suggested to teachers to tear Maa Telugu Talli page from books. He demand to resign all telangana political leaders.