సిఎం చెప్పగానే పిఎంవోకి చేరిన 14ఎఫ్ ఫైల్

By Srinivas

Published: Thursday, August 4, 2011, 12:54 [IST]

హైదరాబాద్: 14ఎఫ్ రద్దు చేశాకే ఎస్సై పరీక్షలు నిర్వహించాలన్న తెలంగాణ వాదుల డిమాండ్ మేరకు 14ఎఫ్ రద్దుకు ఇటు రాష్ట్ర ప్రభుత్వం, అటు కేంద్ర ప్రభుత్వం చురుగ్గా కదులుతున్నట్లుగా కనిపిస్తోంది. 14ఎఫ్ ఫైలును వెంటనే పిఎం కార్యాలయానికి పంపించాల్సిందిగా ముఖ్యమంత్రి కిరణ్ కుమార్ రెడ్డి చేసిన విజ్ఞప్తికి చిదంబరం వెంటనే స్పందించారు. 14ఎఫ్ రద్దు చేయాలని గత అసెంబ్లీలోనే తీర్మానం చేశామని మరోసారి అవసరం లేదని ముఖ్యమంత్రి చిదంబరానికి గురువారం ఫోన్ చేసి చెప్పారు. ఫైలును ప్రధాన మంత్రి కార్యాలయానికి పంపించి రద్దుకు త్వరగా చర్యలు తీసుకోవాలని ఆయన కోరారు. అందుకు చిదంబరం సైతం సానుకూలంగానే స్పందించారు.

సిఎం విజ్ఞప్తి మేరకు ఫైలును పిఎంవో కార్యాలయానికి హోంశాఖ కార్యాలయం పంపించింది. పరీక్షలు మరో పది రోజులలోనే ఉన్న నేపథ్యంలో ప్రధాన మంత్రి సైతం ఫైలును గురువారమే పరిశీలించే అవకాశం ఉంది. ఎస్సై పరీక్షలకు నిత్యం అడ్డు పడుతున్న 14ఎఫ్ ను కేంద్రం రద్దు చేయడానికే పూనుకున్నట్లుగా తెలుస్తోంది. అందుకే త్వరితగతిన ఫైలుపై కదలిక వచ్చినట్లుగా తెలుస్తోంది. ఫైలును తాను పిఎం కార్యాలయానికి పంపినట్లుగా ముఖ్యమంత్రికి చిదంబరం స్వయంగా ఫోన్ చేసి చెప్పినట్లుగా తెలుస్తోంది.

Published On August 4, 2011