'ఐసియులో సోనియా గాంధీ, తోడుగా రాహుల్'

By Srinivas

Published: Friday, August 5, 2011, 12:05 [IST]

న్యూఢిల్లీ: ఎఐసిసి అధ్యక్షురాలు సోనియా గాంధీకి గురువారం జరిగిన శస్త్ర చికిత్స విజయవంతమైందని కాంగ్రెసు పార్టీ శుక్రవారం విడుదల చేసిన ఓ ప్రకటనలో వెల్లడించింది. ఆమె ప్రస్తుతం ఇంటెన్సివ్ కేర్ యూనిట్‌లో(ఐసియు) ఉందని చెప్పారు. సోనియా గాంధీ వెంట ఆమె కుమారుడు, ఎఐసిసి ప్రధాన కార్యదర్శి రాహుల్ గాంధీ, ఆమె కూతురు ప్రియాంక గాంధీ, కూతురు భర్త రాబర్ట్ వాద్రా ఉన్నారని పార్టీ ప్రకటనలో తెలిపింది. కాగా సోనియా గాంధీకి సంబంధించిన అనారోగ్య వివరాలను వెల్లడించేందుకు కాంగ్రెసు పార్టీ విముఖత వ్యక్తం చేసినట్లుగా తెలుస్తోంది.

ఆమె ఆరోగ్యం, వైద్య చికిత్సలకు సంబంధించిన విషయాలు సోనియా వ్యక్తిగతమని అన్నారు. ఆమె వ్యక్తిగత జీవితాన్ని గౌరవించాలని సోనియా కుటుంబం కోరుకుంటోందని తెలిపారు. కాగా సోనియా గాంధీ శస్త్ర చికిత్సకు వెళ్లే సమయంలో ఓ కోర్ కమిటీని వేసిన విషయం తెలిసిందే. అందులో రాహుల్ గాంధీ ఉన్నారు. సోనియా మరో రెండు మూడు వారాలు అక్కడే విశ్రాంతి తీసుకోనున్న నేపథ్యంలో రాహుల్ గాంధీ పార్టీని చూసుకోవడానికి భారత్ తిరిగి రానున్నారు.

Published On August 5, 2011