వైయస్ జగనే మంత్రుల చిట్టా విప్పాలి: నారాయణ

By Pratap

Published: Monday, August 8, 2011, 13:34 [IST]

హైదరాబాద్‌: తన తండ్రి వైయస్ రాజశేఖర రెడ్డి హయాంలో జరిగిన నిర్ణయాల్లో అప్పటి మంత్రుల బాధ్యత కూడా ఉందని వైయస్సార్ కాంగ్రెసు పార్టీ అధ్యక్షుడు వైయస్ జగన్ చేసిన ప్రకటనపై సిపిఐ రాష్ట్ర కార్యదర్శి కె. నారాయణ తీవ్రంగా స్పందించారు. అక్రమాస్తులకు సంబంధించిన వ్యవహారాల్లో వైయస్ మంత్రి వర్గ సభ్యులకు కూడా పాత్ర ఉందని చెబుతున్న జగన్ ఆ మంత్రుల చిట్టా విప్పాలని, ఆ బాధ్యత జగన్‌పై ఉందని ఆయన సోమవారం మీడియా ప్రతినిధుల సమావేశంలో అన్నారు.

ప్రస్తుత రాష్ట్ర అనిశ్చితికి మాజీ ముఖ్యమంత్రి కె. రోశయ్యనే బాధ్యుడని ఆయన విమర్శించారు. శానససభలో అప్పుడే తెలంగాణపై తీర్మానం ప్రతిపాదించి ఉంటే ఇప్పుడు ఈ పరిస్థితి వచ్చేది కాదని ఆయన అన్నారు. రాష్ట్రంలో అగ్గి రగలడానికి రోశయ్య కారణమని ఆయన అన్నారు. సమ్మెకు దిగే తెలంగాణ ఉద్యోగులపై ప్రభుత్వం ఎస్మా కత్తి ప్రయోగిస్తే బలయ్యేది ప్రభుత్వమేనని ఆయన అన్నారు.

Published On August 8, 2011