గాలి సోదరులకు కొత్త సిఎం సదానంద షాక్

By Srinivas

Published: Monday, August 8, 2011, 18:04 [IST]

బెంగళూరు: యడ్యూరప్ప మంత్రివర్గంలో కీలకంగా ఉన్న గాలి జనార్దన్ రెడ్డి సోదరులకు కొత్త ముఖ్యమంత్రి సదానంద గౌడ షాక్ ఇచ్చారు. సదానంద గౌడ కొత్త ముఖ్యమంత్రిగా ఎన్నికైన నేపథ్యంలో పాత మంత్రివర్గం రద్దవుతుంది. సోమవారం సాయంత్రం కొత్త మంత్రివర్గం ప్రమాణ స్వీకారం చేసింది. ఈ మంత్రివర్గంలోకి గాలి సోదరులతో పాటు వారి సన్నిహితుడు శ్రీరాములు సైతం సదానంద గౌడ తీసుకోలేదు. రాష్ట్ర భారతీయ జనతా పార్టీ క్యాడర్‌లోనూ గాలి సోదరులకు మంత్రివర్గంలో చోటు దక్కలేదు. కళంకిత ప్రజాప్రతినిధులకు తన మంత్రివర్గంలో చోటు ఇవ్వకూడదని సదానంద గౌడ నిర్ణయించుకున్నారు.

అయితే కళంకిత మంత్రులకు అని చెప్పినప్పటికీ ఇటీవల కొత్త ముఖ్యమంత్రి ఎన్నిక సమయంలో చివరి నిమిషంలో తనకు వ్యతిరేకంగా ఓటు వేసినందునే మంత్రివర్గంలోకి తీసుకోవడం లేదని పలువురి అభిప్రాయం. అంతేకాకుండా యడ్యూరప్పతో పాటు గాలి సోదరులపైనా లోకాయుక్త అవినీతి ఆరోపణలు చేస్తూ నివేదిక ఇచ్చిన సమయంలో వారిని తీసుకోక పోవడమే మంచిదని సదానంద భావిస్తున్నట్టుగా తెలుస్తోంది. అయితే ఇటీవల యడ్యూరప్పకు చివరి వరకు మద్దతు పలికిన గాలి సోదరులు ఆఖరి నిమిషంలో యడ్డీకి, సదానందకు షాక్ ఇస్తూ జగదీష్ షెట్టార్‌కు ఓటు వేసిన విషయం తెలిసిందే. ఈ విషయంపై యడ్డీ వర్గాల్లో తీవ్ర ఆగ్రహం ఉన్నట్లుగా తెలుస్తోంది. ఇందుకు యడ్డీ సైతం సదానందకు మద్దతు పలికి ఉంటారనేది పలువురి అనుమానం.

Published On August 8, 2011