యుద్ధానికి సిద్ధం: ముఖ్యమంత్రికి కెకె సవాల్

By Srinivas

Published: Tuesday, August 9, 2011, 13:59 [IST]

హైదరాబాద్: ముఖ్యమంత్రి కిరణ్ కుమార్ రెడ్డి యుద్దాన్ని కోరుకుంటే అందుకు తెలంగాణ ప్రాంత ప్రజాప్రతినిధులం సిద్ధంగా ఉన్నామని రాజ్యసభ సభ్యుడు కె కేశవరావు మంగళవారం అన్నారు. హైదరాబాదులోని బాపూఘాట్ వద్ద కాంగ్రెసు పార్టీ తెలంగాణ సాధనా సమితి ఆధ్వర్యంలో తెలంగాణ ప్రార్థనా దీక్ష ప్రారంభించారు. ఈ సందర్భంగా ఆయన మాట్లాడారు. ముఖ్యమంత్రి తెలంగాణ నేతలను పాండవులు, కౌరవులతో పోల్చితే పరిణామాలు తీవ్రంగా ఉంటాయని అన్నారు. అయితే ఆయన అలా పోల్చారని తాము భావించడం లేదని అన్నారు. తాము తమ సీనియర్ల అడుగుజాడల్లో నడుస్తున్నామని అన్నారు. ఉద్యోగులపై ఎస్మా ప్రయోగించడం సరికాదన్నారు. ఎస్మా ప్రయోగిస్తే ఊరుకునేది లేదని ప్రభుత్వాన్ని హెచ్చరించారు.

ఇప్పుడు నడుస్తున్నది క్విట్ ఇండియా ఉద్యమం కాదని ఉన్నది బ్రిటిష్ ప్రభుత్వం అంతకంటే కాదన్నారు. ఎస్మా ప్రయోగించేందుకు సమయం అంతకంటే రాలేదన్నారు. క్విట్ తెలంగాణ ఉద్యమం ఇంకా కాలేదన్నారు. తెలంగాణ వ్యతిరేకులు జై తెలంగాణ అనాలని సూచించారు. తెలంగాణ కోసం ఎవరూ ఉద్యమం చేసినా స్వాగతిస్తామని చెప్పారు. తెలంగాణ కాంక్షిస్తూ త్వరలో హైదరాబాదులో భారీ సైకిల్ ర్యాలీ నిర్వహిస్తామని అన్నారు. రాజీనామాలపై వెనక్కి తగ్గే ప్రసక్తి లేదన్నారు. రాజీనామాలకు తెలంగాణ ప్రాంత కాంగ్రెసు ప్రజాప్రతినిధులు కట్టుబడి ఉన్నారని చెప్పారు.

Published On August 9, 2011