అడ్డుపడితే పాతాళంలో తొక్కేస్తాం: రాములమ్మ

By Srinivas

Published: Tuesday, August 9, 2011, 16:57 [IST]

హైదరాబాద్: తెలంగాణ రాష్ట్రానికి అడ్డుపడే వారిని పాతాళంలోకి తొక్కేస్తాం అని తెలంగాణ రాష్ట్ర సమితి పార్లమెంటు సభ్యురాలు విజయశాంతి మంగళవారం తెలంగాణ భవనంలో ఏర్పాటు చేసిన మహిళా విభాగం భేటీలో అన్నారు. సీమాంధ్రులది కడుపు నిండిన ఉద్యమం అయితే తెలంగాణ వారిది కడుపు కాలిన ఉద్యమం అన్నారు. తెలంగాణలో జరుగుతున్న పోరాటం భూమి కోసం, భుక్తి కోసం, సొంత పాలన కోసం అని అన్నారు. తెలంగాణ కోసం ఇటీవల పార్లమెంటులో ప్రతిపక్ష నేత సుష్మా స్వరాజ్ గట్టిగా తన వాదన వినిపించారని అన్నారు. అదే పార్లమెంటులో సమైక్యవాదులు నోటికొచ్చిన అబద్దాలు మాట్లాడారని అన్నారు. తెలంగాణ ఉద్యమంలో తానో కేంద్ర బిందువు అయినందుకు గర్వపడుతున్నానని అన్నారు.

ఉద్యమానికి మహిళా శక్తి అవసరం అన్నారు. మహిళల పాత్ర ఉద్యమాల్లో అమోఘం అని అన్నారు. తెలంగాణ మహిళలంతా ఉద్యమంలో పాల్గొనాలని పిలుపునిచ్చారు. సీమాంధ్రులు ఆస్తులు, పదవుల కోసమే కపట ఉద్యమం చేస్తున్నారని అన్నారు. తెలంగాణను అడ్డుకునే ప్రయత్నాలు వారు ఆపాలని హెచ్చరించారు. తెలంగాణ వారిది ఉన్నతమైన ఉద్యమం అని అర్థం చేసుకోవాలని ఆమె సీమాంధ్ర నేతలను కోరారు. తెలంగాణ కోసం విద్యార్థులు, యువకులు ఆత్మహత్య చేసుకున్నా సీమాంధ్రుల గుండె కరగడం లేదన్నారు. ఎవరు కూడా ఆత్మహత్యలు చేసుకోవద్దని ఆమె విజ్ఞప్తి చేశారు.

Published On August 9, 2011