చంపేస్తామని ఫోన్‌లలో బెదిరిస్తున్నారు: ఈటెల

హైదరాబాద్: చంపేస్తానంటూ తనకు బెదిరింపు కాల్సు వస్తున్నాయని తెలంగాణ రాష్ట్ర సమితి శాసనసభాపక్ష నేత ఈటెల రాజేందర్ గురువారం అన్నారు. రాజకీయ జెఏసి సమావేశం తర్వాత ఆయన మీడియాతో మాట్లాడారు. గత రెండు నెలలుగా తనను చంపేస్తానంటూ బెదిరింపు కాల్సు వస్తున్నాయని అయితే ఆకతాయిలు చేస్తున్నట్టుగా తను భావించి వాటిని వదిలేశానని చెప్పారు. కానీ గత రాత్రి తన డ్రైవర్ మల్లేష్‌ను పోలీసులు రాత్రి కిడ్నాప్ చేసి తన గురించి ఆరా తీశారని దీంతో తనకు అనుమానాలు బలపడుతున్నాయన్నారు. మొదటిసారి దుబాయ్ నుండి ఫోన్ వచ్చిందన్నారు. ఈ విషయంపై పోలీసులకు ఫిర్యాదు చేసినప్పటికీ వారు పట్టించుకోలేదని ఆరోపించారు.

రాత్రి తన డ్రైవర్ ఇంటికి వెళుతున్న సమయంలో కిడ్నాప్ చేసి తన గురించి పోలీసులు ఆరా తీయడం ఏమిటని ఆయన ప్రశ్నించారు. దీనిపై వెంటనే ప్రభుత్వం సమాధానం చెప్పాలన్నారు. పోలీసులకు చెబితే ఇంటర్నెట్ కాల్ కాబట్టి ట్రేస్ చేయడం కష్టమని పోలీసులు చెబుతున్నారని అన్నారు. నా పరిస్థితే ఇలా ఉంటే ఇక సామాన్యుని పరిస్థితి ఏమిటని ఆయన ప్రశ్నించారు. తాము ప్రాణాలకు తెగించే ఉద్యమంలోకి వచ్చామని చెప్పారు. ఇటీవల ఉద్యోగులకు సైతం బెదిరింపు కాల్సు వస్తున్నాయని వాటిని వదిలి పెట్టేది లేదని తెలంగాణ ఐక్య కార్యాచరణ సమితి చైర్మన్ కోదండరామ్, టిఆర్ఎస్ నేత నాయిని నరసింహారెడ్డి అన్నారు.

English summary

TRSLP Etela Rajender said today that he received threat calls many times in two months. He asked government clarification about threat calls.