వైయస్ జగన్‌కు బాబాయ్ వైయస్ వివేకా బాసట

By Pratap

Published: Thursday, August 11, 2011, 10:59 [IST]

కడప: కష్టకాలంలో తన సోదరుడు వైయస్ రాజశేఖర రెడ్డి కుమారుడు, వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి బాసటగా నిలవాలని కాంగ్రెసు పార్టీ నాయకుడు, మాజీ మంత్రి వైయస్ వివేకానంద రెడ్డి నిర్ణయించుకున్నట్లు అర్థమవుతోంది. ఆ మాటలను బట్టి ఈ విషయం అర్థమవుతోంది. వైయస్ జగన్‌ను దెబ్బ కొట్టేందుకు వైయస్ రాజశేఖర రెడ్డి ఇమేజ్ డ్యామేజీ చేయాలని ప్రయత్నించడం బాధాకరమని ఆయన అన్నారు. అవినీతి తమ ఇంటా వంటా లేదని ఆయన అన్నారు.

వైయస్ జగన్‌పై కాంగ్రెసు నాయకుల వేధింపు చర్యలను ప్రజలు గమనిస్తున్నారని ఆయన అన్నారు. ఏది ధర్మమో, ఏది న్యాయమో దేవుడే నిర్ణయిస్తాడని ఆయన అన్నారు. గత ప్రభుత్వ కేటాయింపులకు వైయస్ జగన్ ఆస్తులకు ఏ విధమైన సంబంధం ఉంటుందని ఆయన అడిగారు. జగన్‌తో కలిసి వైయస్ వివేకానంద రెడ్డి కడప జిల్లాలో వైయస్సార్ విగ్రహావిష్కరణ సభలో పాల్గొన్నారు. బాబాయ్, అబ్బాయ్ పరస్పరం కరచాలనం చేసుకున్నారు. భవిష్యత్తులో జగన్‌కు వైయస్ వివేకానంద రెడ్డి పూర్తి మద్దతు ప్రకటించే అవకాశాలున్నాయని అర్థం చేసుకోవచ్చు.

Published On August 11, 2011