టిడిపికి ఝలక్: నాగంకు లక్ష్మణ్ బాపూజీ ప్రశంసలు

హైదరాబాద్: తెలంగాణ తెలుగుదేశం పార్టీ నేతలకు ప్రముఖ స్వతంత్ర సమరయోధుడు కొండా లక్ష్మణ్ బాపూజీ ఝలక్ ఇచ్చారు. తెలంగాణ తెలుగుదేశం పార్టీ ప్రజా ప్రతినిధులు ఆ పార్టీ అధ్యక్షుడు నారా చంద్రబాబు నాయుడు ఫోటో పెట్టుకొని ఉద్యమం చేస్తే ఎలా నమ్మాలని ప్రశ్నించారు. ఆయన ఫోటో తీసివేసి ఉద్యమం చేస్తేనే సరి అన్నారు. తెలంగాణపై స్పష్టమైన వైఖరి ప్రకటించని చంద్రబాబు ఫోటో పెట్టుకొని టిఎన్‌సిసితో కలిసి ఉద్యమిస్తామంటే నమ్మేది లేదన్నారు. రాజకీయ నాయకులకు టిఎన్‌సిసిలో ప్రవేశం లేదన్నారు. తెలుగుదేశం పార్టీ బహిష్కృత శాసనసభ్యుడు నాగం జనార్దన్ రెడ్డికి తెలంగాణపై స్పష్టమైన వైఖరి ఉందన్నారు.

తెలంగాణ రాజకీయ ఐక్య కార్యాచరణ సమితి ముమ్మాటికీ తెలంగాణ రాష్ట్ర సమితిలో భాగమే అన్నారు. ఈ నెల 14న టిఎన్‌సిసిభవిష్యత్తు కార్యాచరణ ప్రకటిస్తామని చెప్పారు. టిఎన్‌సిసి రాజకీయేతర సంస్థ అని అన్నారు. కాగా తెలంగాణ రాష్ట్ర సమితి ఆధ్వర్యంలో నడుస్తున్నట్లుగా భావిస్తున్న తెలంగాణ రాజకీయ ఐక్య కార్యాచరణ సమితికి ప్రత్యామ్నాయంగా మరో జెఎసి కోసం టిటిడిపి తీవ్ర ప్రయత్నాలు చేసింది. అందులో భాగంగా వారు గద్దర్, విమలక్క, బాపూజీలను కలిశారు. చివరకు బాపూజీ వద్ద వారి ప్రయత్నాలు ఫలించాయి. అయితే ఆయన మాత్రం చంద్రబాబు బొమ్మ తీసేస్తేనే నమ్ముతామని ప్రకటించి టిటిడిపి నేతలకు ఝలక్ ఇచ్చారు.

English summary

Konda Laxman Bapuji gave shock to Telangana Telugudesam party with praising suspended mla Nagam Janardhan Reddy.