జగన్, లగడపాటిలని గజదొంగలన్న రేవంత్ రెడ్డి

By Srinivas

Published: Friday, August 12, 2011, 15:11 [IST]

హైదరాబాద్: విజయవాడ పార్లమెంటు సభ్యుడు లగడపాటి రాజగోపాల్‌పై తెలుగుదేశం పార్టీ శాసనసభ్యుడు రేవంత్ రెడ్డి శుక్రవారం తీవ్రస్థాయిలో ధ్వజమెత్తారు. వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి అవినీతిపరుడని తెలిసి ఆయన కంపెనీలలో లగడపాటి పెట్టుబడులు ఎలా పెట్టారని ప్రశ్నించారు. గతంలో జగన్ మంచి వ్యాపార వేత్తగా పొగిడిన లగడపాటి ఇటీవల జగన్‌ను విమర్శించడంలో అర్థం లేదన్నారు. జగన్ కంపెనీలలో లగడపాటి పెట్టుబడులు పెట్టినట్లుగా హైకోర్టు తీర్పు ద్వారా బయటపడిందన్నారు. లగడపాటికి జగన్‌తో వాటాలు కుదరక పోవడం వల్లనే ఇప్పుడు జగన్ అవినీతిపరుడని అంటున్నారని అన్నారు. అయితే ప్రజలను దోచుకోవడంలో వారంతా ఒకటే అన్నారు. వారంతా గజదొంగలే అన్నారు. జగన్ అక్రమాలపై లగడపాటికి చిత్తశుద్ధి ఉంటే సిబిఐకి లేఖ రాయాలని డిమాండ్ చేశారు. లేఖ రాయకుంటే అవినీతిలో లగడపాటికి వాటా ఉన్నట్లే అని ఆరోపించారు.

జగన్ అవినీతిపరుడు, సరియైన వ్యక్తి కాదని తెలిసి లగడపాటి గతంలో వైయస్ మృతి చెందగానే ఆయనను ముఖ్యమంత్రి అభ్యర్థిగా ఎందుకు బలపరిచారని ప్రశ్నించారు. ఆయన అప్పుడు చెప్పింది తప్పా? ఇప్పుడు చెప్పింది తప్పా? ఆయనే చెప్పాలన్నారు. లగడపాటి చెబుతున్న మాటలకు చేస్తున్న పనులకు పొంతన లేదన్నారు. లగడపాటి ప్రజలను మభ్యపెట్టే మాటలు మానుకోవాలన్నారు. సత్యం రామలింగరాజు వంటి వారు జైలుకు వెళ్లినప్పటికీ చాలామంది అక్రమార్కులు జైలు బయటే ఉన్నారన్నారు. లగడపాటి టిడిపితో ఉన్నప్పుడు రాజకీయ నాయకుడు కాదని అప్పటికీ ఆయనపై అవినీతి ఆరోపణలు సైతం లేవన్నారు.

తాను వ్యక్తిగత పనుల వల్లనే తెలంగాణ తెలుగుదేశం ఫోరం తరఫున ఢిల్లీకి వెళ్లలేక పోయానని అన్నారు. ఫోరంలోని ఓ ఒక్క వ్యక్తో వెళ్లనంత మాత్రాన ఆగిపోయేది ఏమీ ఉండదన్నారు. తెలంగాణ తెలుగుదేశం పార్టీ తెలంగాణకు కట్టుబడి ఉందన్నారు. తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు ఆలోచనలను తెలంగాణ రాజకీయ ఐక్య కార్యాచరణ సమితి చైర్మన్ ప్రొఫెసర్ కోదండరామ్ అమలు పరుస్తారని ఆరోపించారు.

Published On August 12, 2011