భూ స్కామ్‌లో రోశయ్యకు ఎసిబి కోర్టులో క్లీన్ చిట్

హైదరాబాద్: హైదరాబాదులోని అమీర్‌పేట భూమి కుంభకోణం కేసులో మాజీ ముఖ్యమంత్రి కె. రోశయ్యకు క్లీన్‌చిట్ లభించింది. ఈ కేసులో రోశయ్య అక్రమాలకు పాల్పడినట్లు ఏ విధమైన ఆధారాలు లేవని అవినీతి నిరోధక శాఖ (ఎసిబి) కోర్టు అభిప్రాయపడింది. వందల కోట్ల రూపాయల విలువ చేసే అమీర్‌పేటలోని భూమిని రోశయ్య అతి తక్కువ ధరకు ఓ వ్యక్తిగా కట్టబెట్టారని ఆరోపిస్తూ శ్రీరంగారావు అనే న్యాయవాది ఎసిబి కోర్టులో కేసు వేశారు. రోశయ్యపై, ఆరోపణలు వచ్చిన 14 మంది ప్రభుత్వాధికారులపై ఎసిబి దర్యాప్తు జరిపింది.

అమీర్‌పేట భూముల వ్యవహారంపై ఎసిబి మంగళవారం కోర్టుకు తుది నివేదికను సమర్పించింది. రోశయ్య గానీ, అధికారులు గానీ భూ అప్పగింతలో ఏ విధమైన అధికార దుర్వినియోగానికి పాల్పడలేదంటూ కేసును కొట్టేయాలని ఎసిబి కోర్టును కోరింది. అయితే, దీనిపై శ్రీరంగారావు హైకోర్టుకు వెళ్లే అవకాశం ఉంది.

English summary

ACB court gave clean chit to former CM K Rosaiah in ameerpet land scam case.