వైయస్ జగన్‌లాంటి కొడుకు ఎవరికీ వద్దు: ఆనం

By Srinivas

Published: Tuesday, August 16, 2011, 15:32 [IST]

హైదరాబాద్: వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వంటి కొడుకు ఎవరికీ ఉండవద్దని ఆర్థిక శాఖ మంత్రి ఆనం రామనారాయణ రెడ్డి మంగళవారం అన్నారు. సిబిఐ విచారణ ఎదుర్కొనలేకే జగన్ అనుచిత వ్యాఖ్యలు చేస్తున్నారని విమర్శించారు. దివంగత ముఖ్యమంత్రి వైయస్ రాజశేఖర రెడ్డి ప్రతిష్టను దిగజార్చేలా మాట్లాడుతున్నారని అన్నారు. సిబిఐ సమగ్ర విచారణలో వాస్తవాలు వెల్లడవుతాయన్నారు. వైయస్‌ను కించపరిచేలా జగన్ చర్యలు ఉన్నాయన్నారు. తన కంపెనీలలో అక్రమ పెట్టుబడులు లేవని చెబుతున్న జగన్ అన్ని పెట్టుబడులు సక్రమమైనవే అయినప్పుడు విచారణకు సహకరించాలని డిమాండ్ చేశారు. మంత్రివర్గ సమావేశానికి మంత్రులంతా హాజరవుతారని ఆయన ఆశాభావం వ్యక్తం చేశారు.

2004 ఎన్నికలలో సమష్టి కృషి వల్లే పార్టీ అధికారంలోకి వచ్చిందన్నారు. గెలుపు ఏ ఒక్కరిదో కాదన్నారు. వైయస్ హయాంలో జరిగిన అక్రమాలకు వైయస్‌తో పాటు సంబంధింత మంత్రి బాధ్యులన్నారు. ఇతర మంత్రుల బాధ్యత లేదన్నారు. సిబిఐ విచారణకు సహకరిస్తామని అన్నారు. హైకోర్టు తీర్పుపై జగన్‌కు సుప్రీంకు వెళ్లే హక్కు ఉందన్నారు. జగన్ కాంగ్రెసులోకి వస్తే అగ్నిపునీతుడు అవుతారని అన్నారు.

Published On August 16, 2011