జగన్‌కు వైయస్ దోచి పెట్టారు: చంద్రబాబు నాయుడు

By Srinivas

Published: Tuesday, August 16, 2011, 11:39 [IST]

హైదరాబాద్: వైయస్సాఆర్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి కాంగ్రెసు అనే విషపు చెట్టులో ఓ కొమ్మ అని తెలుగుదేశం పార్టీ అధినేత నారా చంద్రబాబు నాయుడు మంగళవారం ఎన్టీఆర్ ట్రస్టు భవనంలో ధ్వజమెత్తారు. దివంగత ముఖ్యమంత్రి వైయస్ రాజశేఖర రెడ్డి తనయుడికి రాష్ట్ర సంపదను దోచి పెట్టారని ఆరోపించారు. జాతీయ స్థాయిలో బిజెపితో తప్ప ఏ పార్టీకి తాము వ్యతిరేకం కాదని చెప్పడం ద్వారా జగన్ తన వైఖరిని చెప్పారని అభిప్రాయపడ్డారు. వైయస్ హయాంలోని అవినీతిపై తెలుగుదేశం పార్టీ కొత్తగా పోరాటం చేయడం లేదన్నారు. ఆయన బతికి ఉన్న సమయం నుండే పోరాటం చేస్తున్నామన్నారు.

వైయస్ హయాంలో ప్రభుత్వం నుండి సహాయం పొందిన వారు జగన్ కంపెనీలలో పెట్టుబడులు పెట్టారని ఆరోపించారు. రాష్ట్రంలో రైతుల పరిస్థితి చాలా దీనంగా ఉందన్నారు. రైతుల ప్రభుత్వమని చెప్పుకునే కాంగ్రెసు హయాంలో రైతులకు మద్దతు ధర లేదన్నారు. రైతులు పంట విరామాన్ని ప్రకటించే పరిస్థితి ఏర్పడిందన్నారు. రాష్ట్ర ప్రభుత్వంపై రైతులను చిన్నచూపు చూస్తుందన్నారు. కాంగ్రెసు హయాంలో వ్యవసాయం మనుగడ కష్టమైందన్నారు. యుపిఏ ప్రభుత్వం హయాంలో నిత్యావసర వస్తువుల ధరలు నిత్యం పెరుగుతున్నాయన్నారు. దేశంలో అవినీతి బాగా పెరిగి పోయిందన్నారు.

Published On August 16, 2011