అనిల్ మృతిపై తొలగని అనుమానాలు, మళ్లీ పోస్టుమార్టం

By Srinivas

Published: Tuesday, August 16, 2011, 12:53 [IST]

హైదరాబాద్: సంగీత దర్శకుడు అనిల్ రెడ్డి మృతిపై మిస్టరీ మరోసారి తెరపైకి వచ్చింది. ఇప్పటికే అనిల్ మృతదేహానికి రెండుసార్లు పోస్టుమార్టం చేసినప్పటికీ కుటుంబ సభ్యులు అనిల్ రెడ్డి మృతిపై అనుమానాలు ఉన్నాయంటూ హైకోర్టుకు వెళ్లారు. దీంతో హైకోర్టు మరోసారి పోస్టుమార్టం నిర్వహించాలని ఆదేశాలు జారీ చేసిన నేపథ్యంలో మంగళవారం పోస్టుమార్టం నిర్వహిస్తున్నారు. అయితే ఈసారి వరంగల్, కర్నూలుకు చెందిన ఫోరెనిక్స్ వైద్యులు పోస్టుమార్టం నిర్వహించున్నట్లుగా సమాచారం. పోస్టుమార్టం అనంతరం మొదటి రెండు పోస్టుమార్టం నివేదికలతో పాటు తాజా నివేదికను సైతం వైద్యులు హైకోర్టుకు సమర్పిస్తారు. ఆ తర్వాతే మిస్టరీకి తెరపడే అవకాశం ఉంది.

ఆరు నెలల క్రితం అనిల్ రెడ్డి మృతి చెందారు. ఇతను తన ప్రియురాలు ఇంట్లో మృతి చెందారు. దీంతో ఆయన కుటుంబం వారు ప్రియురాలిపై అనుమానాలు వ్యక్తం చేస్తున్నారు. మొదటిసారి పోస్టుమార్టం నిర్వహించిన గాంధీ వైద్యుల నివేదికలో అనిల్ రెడ్డి తలకు గాయాలు ఉన్నాయని తేలింది. రెండోసారి పోస్టుమార్టం నిర్వహించిన ఉస్మానియా వైద్యుల నివేదికలో గాయాలు లేనట్లుగా తేలింది. అనిల్ రెడ్డి మృతి సహజమైనదే అని రెండోసారి పోస్టుమార్టం నిర్వహించిన వైద్యులు తేల్చారు. దీంతో కుటుంబ సభ్యులు కోర్టుకు వెళ్లారు.

Published On August 16, 2011