అమ్మాయిపై అత్యాచారం చేసి యాసిడ్ పోసి హత్య!

By Srinivas

Published: Wednesday, August 17, 2011, 17:53 [IST]

విశాఖపట్నం: ఓ అమ్మాయిపై అత్యాచారం చేసి ఆమె గుర్తు పడుతుందేమో అనే ఉద్దేశ్యంతో యాసిడ్‌తో కాల్చి చంపిన సంఘటన విశాఖపట్నం జిల్లాలో బుధవారం వెలుగులోకి వచ్చింది. జిల్లాలోని మాకవరపాలెం మండలం సీతన్నఆగ్రహారంకు చెందిన రోహిణి అనే ఇరవయ్యేళ్ల యువతి మృతదేహం గ్రామ శివారులో బుధవారం కనిపించింది. ఆమె మృతదేహం సగం కాలిపోయి ఉంది. ఆమె ఒంటిపైన తీవ్రంగా గాయాలు ఉన్నాయి. దీంతో ఎవరో దుండగులు అత్యాచారం చేసి యాసిడ్ పోసి హత్య చేసి ఉంటారని పోలీసులు అనుమానాలు వ్యక్తం చేస్తున్నారు. రోహిణి రెండు రోజుల క్రితం సినిమా కోసం వెళ్లి అప్పటి నుండి కనిపించడం లేదు.

ఆగస్టు 15న రోహిణి మరో గ్రామంలోని తన స్నేహితురాలితో కలిసి పక్కనున్న పట్టణానికి సినిమా చూసేందుకు వెళ్లింది. మొదటి ఆట చూసిన అనంతరం రాత్రి తొమ్మిది గంటలకు తన ఊరికి బస్సులో తిరుగు ప్రయాణం అయింది. తన స్నేహితురాలిది వేరే గ్రామం కావడంతో వేరు వేరు బస్సులు ఎక్కారు. ఆ తర్వాత రోహిణి ఇంటికి తిరిగి రాలేదు. రోహిణి స్నేహితురాలికి సైతం బుధవారం ఉదయం వరకు రోహిణి ఇంటికి వెళ్లిన విషయం తెలియదని సమాచారం. దీంతో రెండు రోజుల క్రితమే దుండగులు ఆమెపై అత్యాచారం చేసి ఉంటారని అయితే వారు తెలిసిన వారు కావడంతో గుర్తు పడుతుందేమో అన్న ఉద్దేశ్యంతో ఆమెను హత్య చేసి ఉంటారని అనుమానాలు వ్యక్తం అవుతున్నాయి.

Published On August 17, 2011