వైయస్ జగన్‌కు చిక్కులు: సిబిఐ బృందాల మోహరింపు

By Pratap

Published: Wednesday, August 17, 2011, 19:51 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్, ఎమ్మార్ సంస్థల్లో సోదాలకు నాంపల్లి సిబిఐ కోర్టు అనుమతి ఇచ్చిన నేపథ్యంలో సిబిఐ బృందాలు హైదరాబాదులో మోహరిస్తున్నాయి. దక్షిణాది కేంద్రాల నుంచి హైదరాబాదుకు పది సిబిఐ బృందాలను రప్పించినట్లు వార్తలు వస్తున్నాయి. కోర్టు అనుమతి పొందిన తర్వాత సిబిఐ జాయింట్ డైరెక్టర్ లక్ష్మినారాయణ దిల్‌కుషా అతిథి గృహంలో అధికారులతో సమావేశమయ్యారు. సోదాలకు కార్యాచరణ రూపొందించారు. ఏ క్షణంలోనైనా జగన్ కార్యాలయాలపై సిబిఐ దాడులు జరగవచ్చుననే వార్తలు వస్తున్నాయి. దీంతో వైయస్ జగన్ పూర్తిగా చిక్కుల్లో పడినట్లేనని భావిస్తున్నారు. సీల్డ్ పెట్టెల్లో వివిధ సంస్థల డాక్యుమెంట్లను లక్ష్మీనారాయణ తెప్పించుకున్నారు. వాటిని క్రోడీకరించి, ఏక కాలంలో దాడులు నిర్వహించేందుకు సన్నాహాలు చేసుకుంటున్నట్లు తెలుస్తోంది.

మొత్తం 32 సంస్థల్లో సోదాల నిర్వహణకు సిబిఐ అనుమతి పొందినట్లు ఓ చానెల్ చెబుతుండగా మరో టావీ చానెల్ 30 చోట్ల సోదాలకు ఏర్పాట్లు జరుగుతున్నట్లు చెబుతోంది. మరో టీవీ చానెల్ 28 సంస్థల పత్రాలను సిబిఐ అధికారులు పరిశీలిస్తున్నారంటూ వార్తాకథనాన్ని ప్రసారం చేసింది. విశాఖపట్నం, చెన్నై, బెంగళూర్‌ల నుంచి సిబిఐ బృందాలను పిలిపించినట్లు తెలుస్తోంది. అయితే, సిబిఐ అధికారులు మాత్రం దర్యాప్తుపై పెదవి విప్పడం లేదు.

జగతి పబ్లికేషన్స్, ఎమ్మార్ సంస్థల్లో సోదాలకు రెండు ప్రత్యేక బృందాలను సిబిఐ ఏర్పాటు చేసింది. జగతి పబ్లికేషన్స్, భారతి సిమెంట్స్, ఇండియా బుల్స్, సందేశ్ ల్యాబ్, క్లాసిక్ రియాలిటీస్, గ్రిల్‌క్రిస్ట్ ఇన్వెస్ట్‌మెంట్స్, యూనిటెక్, అపర్ణ, ఫైనాన్స్ ఇన్‌ఫ్రా, వాల్టెన్ ప్రాపర్టీస్ పత్రాలను సిబిఐ అధికారులు పరిశీలిస్తున్నట్లు వార్తలు వస్తున్నాయి. హెటెరో డ్రగ్స్, హెటెరో ల్యాబ్స్, జూబ్లీ మీడియా, అరవిందో ఫార్మా, ఆల్ఫా విల్లాస్, ఆల్ఫా ఎవెన్యూస్, ఇండియా సిమెంట్, జననీ ఇన్‌ఫ్రా, ఎకె దండమూడి, ఎపిఐఐసి పోలేపల్లి సెజ్, నిమ్మగడ్డ ప్రసాద్, పయనీర్, వ్యాన్‌పిక్, హెటెరో హెల్త్ కేర్ వంటి సంస్థలపై కూడా సిబిఐ దృష్టి సారించినట్లు తెలుస్తోంది. ఈ సంస్థలతో జగన్‌కు గల సంబంధాలపై ఆరా తీస్తున్నట్లు చెబుతున్నారు.

Published On August 17, 2011