సిబిఐ దాడులు కక్ష సాధింపు: వైయస్ జగన్

By Srinivas

Published: Thursday, August 18, 2011, 16:40 [IST]

విజయవాడ: తనపై సిబిఐ దాడులు కక్ష సాధింపు చర్యల్లో భాగమేనని వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి గురువారం తన ఓదార్పు యాత్రలో ఆరోపించారు. కృష్ణా జిల్లాలో జగన్ ఓదార్పు యాత్ర నాలుగో రోజు కొనసాగుతుంది. ఈ సందర్భంగా ఆయన ప్రజలనుద్దేశించి మాట్లాడారు. వైయస్ఆర్‌ను అప్రతిష్ట పాలు చేయడానికే కాంగ్రెసు పార్టీ తెలుగుదేశం పార్టీతో కుమ్మక్కయిందని ఆరోపించారు. దివంగత ముఖ్యమంత్రి వైయస్ రాజశేఖర రెడ్డి ప్రతిష్ట తగ్గించేందుకు జాతీయ కాంగ్రెసు పార్టీ కుట్ర చేస్తుందన్నారు. కాంగ్రెసు, తెలుగుదేశం పార్టీ అవినీతి గురించి మాట్లాడటం దయ్యాలు వేదాలు వల్లించినట్లుగా ఉందన్నారు. ఏఐసిసి అధ్యక్షురాలు సోనియా గాంధీ ఈ రోజు రాజ్యమేలుతుందంటే కారణం వైయస్ఆర్ రెక్కల కష్టమే అని అన్నారు.

కాగా అనిగండ్లపాడుతోపాటు పలుచోట్ల దివంగత వైయస్సాఆర్ విగ్రహాన్ని జగన్ ఆవిష్కరించారు. కాంగ్రెసు పార్టీ జగన్‌పై దాదాగిరి, దౌర్జన్యం చేస్తోందని తుడా మాజీ చైర్మన్ చెవిరెడ్డి భాస్కర రెడ్డి వేరుగా హైదరాబాదులో అన్నారు. జగన్‌ను దెబ్బతీయడానికి సిబిఐని పావుగా వాడుకుంటోందని అన్నారు. కాగా మరోవైపు జగన్ ఆస్తులపై సిబిఐ దాడులు నిర్వహిస్తున్న విషయం తెలిసిందే. హైదరాబాదు, బెంగుళూరు, చెన్నై, ముంబయి, కలకత్తా, హౌరా తదితర పట్టాణాలలోని జగన్ ఇళ్లపై, జగన్ కంపెనీలలో పెట్టుబడులు పెట్టిన కంపెనీ కార్యాలయాలపై దాడులు చేస్తున్నారు.

Published On August 18, 2011