సిబిఐ దర్యాఫ్తుకు సహకరించండి: వైయస్ జగన్

By Srinivas

Published: Thursday, August 18, 2011, 10:56 [IST]

హైదరాబాద్: సిబిఐ దర్యాఫ్తుకు సహకరించాలని వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి తన కుటుంబ సభ్యులకు సూచించారు. ఈ విషయాన్ని మాజీ మంత్రి బాలినేని శ్రీనివాస్ రెడ్డి విలేకరులతో చెప్పారు. జగన్ ఆస్తులపై జరుగుతున్న సిబిఐ దాడులు రాజకీయ దాడులే అని ఆయన ఆరోపించారు. జగన్‌తో తాను ఇప్పుడే మాట్లాడానని చెప్పారు. తన కుటుంబ సభ్యులు అందరూ సిబిఐకి సహకరించాలని ఆయన కోరినట్లు బాలినేని చెప్పారు.

జగన్ ఒక్కడి పైనే సిబిఐ దాడులు నిర్వహించడం కాకుండా దివంగత వైయస్ రాజశేఖర రెడ్డి మంత్రివర్గం పైనా సిబిఐ దాడులు చేయాలని ఆయన డిమాండ్ చేశారు. సిబిఐ దర్యాఫ్తుకు నాటి మంత్రివర్గంలోని వ్యక్తిగా తాను సిద్ధంగా ఉన్నానని మిగిలిన మంత్రులూ సిద్ధంగా ఉండాలని ఆయన సవాల్ చేశారు. తెలుగుదేశం పార్టీ అధినేత నారా చంద్రబాబునాయుడు ఆస్తులపైనా సిబిఐ దర్యాఫ్తు చేయాలని ఆయన డిమాండ్ చేశారు.

Published On August 18, 2011