జగన్ అక్రమాలలో కెవిపి పాత్ర: కడియం శ్రీహరి

By Srinivas

Published: Friday, August 19, 2011, 13:18 [IST]

వరంగల్: వైయస్సాఆర్సీ పార్టీ అధినేత వైయస్ జగన్మోహన్ రెడ్డి అక్రమాలలో కెవిపి రామచంద్రారావుకు భాగం ఉందని తెలుగుదేశం పార్టీ సీనియర్ నేత కడియం శ్రీహరి శుక్రవారం ఆరోపించారు. జగన్ ఆస్తులపై సిబిఐ విచారణ మరింత లోతుగా జరగాలని ఆయన అభిప్రాయపడ్డారు. జగన్ ఆస్తుల కేసులతో సంబంధం ఉన్న వారందరిపైనా కేసులు పెట్టాలని ఆయన డిమాండ్ చేశారు. దివంగత ముఖ్యమంత్రి వైయస్ రాజశేఖర రెడ్డి హయాంలోని మంత్రులందరూ జైలుకు వెళ్లాల్సిందేనని ఆయన అన్నారు. ఈ నెల 22న కె కేశవరావు, జానారెడ్డి, సారయ్యల వంటి కాంగ్రెసు సీనియర్ నేతలతో కలిసి రాజీనామాలపై చర్చించి నిర్ణయం తీసుకుంటామని అన్నారు.

తెలంగాణ రాజకీయ ఐక్య కార్యాచరణ సమితి చైర్మన్ కోదండరాంకు తమ రాజీనామా అడిగే హక్కు లేదని ఎర్రబెల్లి దయాకర రావు అన్నారు. తెలంగాణ టిడిపి నేతలు రాజీనామాకు సిద్ధంగా ఉన్నారని అన్నారు. ప్రజలు కోరిన వెంటనే రాజీనామాలు చేస్తామని అన్నారు. కోదండరాం కెసిఆర్ ఏజెంట్ అని ధ్వజమెత్తారు. కోదండరాం కొన్ని పార్టీలకే వత్తాసు పలకడం వలన ఇప్పటికే జెఏసి నుండి చాలా పార్టీలు బయటకు వెళ్లి పోయాయని అన్నారు. రాజ్యాంగ సంక్షోభం వల్లనే తెలంగాణ సాధ్యం అన్నారు. కెసిఆర్, మంత్రుల రాజీనామాల కోసం కోదండరాం ఎందుకు నిలదీయడం లేదని ప్రశ్నించారు.

Published On August 19, 2011