టిడిపి అధినేత చంద్రబాబుపై కెసిఆర్ టి-ఛానల్ ధ్వజం

By Srinivas

Published: Friday, August 19, 2011, 9:19 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడుపై తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుకు చెందిన టి-ఛానల్ శుక్రవారం తీవ్ర విమర్శలు చేసింది. తెలంగాణ ప్రాంతంలో తెలంగాణ ఉద్యమం తీవ్రరూపం దాల్చిన నేపథ్యంలో తెలుగుదేశం పార్టీ పూర్తిగా కనుమరుగు అయిపోయిందని ఆరోపించింది. పార్టీ పూర్తిగా తుడిచి పెట్టుకు పోయిన సమయంలో పార్టీకి జవసత్వాలు నింపేందుకు చంద్రబాబుకు దిక్కుతోచని పరిస్థితుల్లో సామాజిక సంస్కర్త అన్నాహజారే అవినీతి ఉద్యమం కలిసి వచ్చిందని అన్నారు.

అవినీతిపై అన్నాహజారే చేస్తున్న ఉద్యమాన్ని తీసుకొని రాష్ట్రంలో ముఖ్యంగా తెలంగాణ ప్రాంతంలో టిడిపికి పాత వైభవం తీసుకు రావాలని చంద్రబాబు కలలు కంటున్నారని ఆరోపించింది. అయితే చంద్రబాబును తెలంగాణ ప్రజలు నమ్మే పరిస్థితి లేదని చెప్పింది. అవినీతిపై ఉద్యమం ద్వారా తెలంగాణలో తిరిగి పాగా వేయాలన్న చంద్రబాబు కుయుక్తులను తెలంగాణ ప్రజలు అర్థం చేసుకుంటున్నారని అన్నది. అంతేకాకుండా తెలంగాణ భూములను అప్పనంగా కంపెనీలకు కట్టబెట్టడం చంద్రబాబు హాయం నుండే ప్రారంభమైనదని ఆరోపణలు చేసింది.

Published On August 19, 2011