వైయస్ జగన్‌కు వైయస్ కవర్, కాంగ్రెసుపై నిందలు

హైదరాబాద్: తన ఆస్తులపై సిబిఐ సోదాలు జరుగుతున్న నేపథ్యంలో వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి తన తండ్రి, దివంగత ముఖ్యమంత్రి వైయస్ రాజశేఖర రెడ్డిని కవర్‌గా వాడుకునే ప్రయత్నం చేస్తున్నారు. వైయస్సార్‌ను అప్రతిష్టపాలు చేసేందుకు కాంగ్రెసు పార్టీ తెలుగుదేశం పార్టీ అధ్యక్షుడు చంద్రబాబునాయుడితో కుమ్మక్కయ్యారంటూ ఆయన పదే పదే విమర్శలు చేస్తున్నారు. తాజాగా వైయస్ జగన్‌కు చెందిన సాక్షి డైలీ వార్తాకథనం కూడా ఇదే విషయాన్ని ధ్రువీకరిస్తోంది. సిబిఐ విచారణ యావత్తూ కాంగ్రెసు డైరెక్షన్‌లోనే జరుగుతోందని, ఢిల్లీ నుంచి సిబిఐ ప్రకటన విడుదల చేయడమే ఇందుకు నిదర్శనమని ఆ వార్తాకథనం వ్యాఖ్యానించింది.

వైయస్ రాజశేఖర రెడ్డి ప్రతిష్టను దిగజార్చేందుకు కాంగ్రెసు పార్టీ పథకం ప్రకారం కుట్ర పన్నుతోందని గురువారంనాటి సిబిఐ పత్రికా ప్రకటనే సాక్షిగా స్పష్టమైందని సాక్షి వ్యాఖ్యానించింది. వైయస్ కుటుంబాన్ని కూడా అప్రతిష్టపాలు చేసేందుకు వ్యూహం ప్రకారమే ఎమ్మెల్యే శంకరరావును ఆయుధంగా పార్టీ వాడుకున్న వైనాన్ని తాజా పరిణామాలు మరోసారి ధ్రువీకరిస్తున్నాయని విమర్శించింది. వైయస్ హయాంలో ప్రభుత్వం తీసుకున్న నిర్ణయాలన్నింటికీ మంత్రివర్గం మొత్తానిదీ సమష్టి బాధ్యతన్న వాస్తవాన్ని పక్కదారి పట్టించేందుకు కొంత కాలంగా రకరకాలుగా ప్రయత్నిస్తున్న కాంగ్రెసు, తాజాగా సిబిఐని కూడా ఆయుధంగా వాడుకుంటోందని వ్యాఖ్యానించింది.

English summary

YSR Congress president YS Jagan is using YS Rajasekhar Reddy as cover to oppose CBI probe.