సోనియా డైరెక్షన్‌తోనే సిబిఐ దాడులు: అంబటి రాంబాబు

By Pratap

Published: Saturday, August 20, 2011, 15:06 [IST]

గుంటూరు/హైదరాబాద్: కాంగ్రెసు పార్టీ అధ్యక్షురాలు సోనియా గాంధీ డైరెక్షన్‌తోనే తమ పార్టీ అధ్యక్షుడు వైయస్ జగన్ ఆస్తులపై దాడులు జరుగుతున్నాయని వైయస్సార్ కాంగ్రెసు పార్టీ అధికార ప్రతినిధి అంబటి రాంబాబు అన్నారు. వైయస్సార్ తమ దేవుడని చెప్పుకున్నవారు సిబిఐ ఐఎఫ్ఆర్‌లో దోషిగా పేర్కొంటే ఎందుకు మాట్లాడడం లేదని ఆయన శనివారం మీడియా ప్రతినిధుల సమావేశంలో ప్రశ్నించారు. సిగ్గులేదు కాబట్టే వారు మాట్లాడడం లేదని ఆయన అన్నారు. జగన్ ఆస్తులపై సిబిఐ దాడులకు కాంగ్రెసు పెద్దలు, తెలుగుదేశం పార్టీ అధ్యక్షుడు చంద్రబాబునాయుడు సూత్రధారులని ఆయన అన్నారు.

వైయస్ జగన్ వర్గానికి చెందిన శాసనసభ్యులు రాజీనామాలు చేయాలని డిమాండ్ చేసిన మంత్రి డిఎల్ రవీంద్రా రెడ్డిపై శాసనసభ్యురాలు శోభా నాగిరెడ్డి తీవ్రంగా మండిపడ్డారు. అందరం రాజీనామా చేసి, కాంగ్రెసువారు వైయస్ ఫోటో లేకుండా గెలవాలని ఆమె సవాల్ చేశారు. వైయస్సార్ ఫొటో పెట్టుకుని గెలిచి ఇప్పుడు సవాల్ చేస్తున్నారని ఆమె శనివారం హైదరాబాదులో మీడియా ప్రతినిధులతో అన్నారు. తమ రాజీనామాల గురించి మాట్లాడే నైతిక హక్కు డిఎల్ రవీంద్రా రెడ్డికి లేదని ఆమె అన్నారు. ముందు తన నియోజకవర్గంలో డిఎల్ రవీంద్రా రెడ్డి డిపాజిట్ దక్కించుకోవాలని ఆమె అన్నారు. ప్రజల నుంచి వ్యతిరేకత వస్తుందనే ఉద్దేశంతోనే సిబిఐ దర్యాప్తులో తమ ప్రమేయం లేదని కాంగ్రెసు చెప్పుకుంటోందని ఆమె అన్నారు.

Published On August 20, 2011