అరెస్టులపై నిర్ణయం తీసుకోలేదు: లక్ష్మీనారాయణ

By Pratap

Published: Saturday, August 20, 2011, 14:46 [IST]

హైదరాబాద్: జగన్ ఆస్తులు, ఎమ్మార్ ప్రాపర్టీస్ కేసుల్లో అరెస్టులపై ఇంకా నిర్ణయం తీసుకోలేదని సిబిఐ జాయింట్ డైరెక్టర్ లక్ష్మీనారాయణ చెప్పారు. శనివారం నాలుగు చోట్ల సోదాలు జరిగినట్లు ఆయన మీడియా ప్రతినిధులతో చెప్పారు. దర్యాప్తులో భాగంగా అరెస్టులు ఉంటాయని ఆయన అన్నారు. తమకు లభిస్తున్న ఆధారాలను బట్టి దర్యాప్తు ఉంటుందని ఆయన అన్నారు. దర్యాప్తులో లభించే అంశాల ఆధారంగా మరికొందరిపై కేసులు నమోదు చేస్తామని ఆయన అన్నారు. అవసరమైన పత్రాలను పరిశీలన కోసం స్వాధీనం చేసుకున్నట్లు ఆయన తెలిపారు. బ్యాంక్ ఖాతాల సీజ్‌పై పరిశీలిస్తున్నట్లు ఆయన చెప్పారు. బెంగుళూర్‌లో సోదాలు ముగిసినట్లు ఆయన తెలిపారు.

బెంగుళూర్ సోదాల్లో స్వాధీనం చేసుకున్న పత్రాలను సిబిఐ అధికారులు పెట్టెల్లో హైదరాబాదుకు తీసుకుని వచ్చారు. బెంగుళూర్‌లోని వైయస్ జగన్ నివాసంలో కూడా సోదాలు ముగిశాయి. బెంగుళూర్‌లో మాధవన్ రామచంద్రన్ ఇంటిలో, కార్యాలాయల్లో సిబిఐ అధికారులు తనిఖీలు నిర్వహించారు. సండూర్, జననీ ఇన్‌ఫ్రా, కార్మియిల్ ఏషియా, క్లాసిక్ రియాల్టీ, శతాబ్ది, షైన్ ఫైనాన్స్ తదితర కార్యాలయాల్లో సిబిఐ అధికారులు సోదాలు నిర్వహించారు.

Published On August 20, 2011