ఇక రాజీనామాలే: వైయస్ జగన్ ఎమ్మెల్యేల నిర్ణయం

By Srinivas

Published: Sunday, August 21, 2011, 14:15 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం శాసనసభ్యులు రాజీనామాలు చేయాలని నిర్ణయించుకున్నారు. రాజీనామాలు చేయడానికి వారు రెండు కారణాలు చెబుతున్నారు. ఒకటి జగన్‌ను లక్ష్యంగా చేసుకొని రాజకీయ దాడులు చేయడం, రెండోది దివంగత ముఖ్యమంత్రి వైయస్ రాజశేఖర రెడ్డి పేరును ఎఫ్ఐఆర్‌లో నమోదు చేయడం. ఆదివారం ఉదయం జగన్ వర్గానికి చెందిన 24 మంది శాసనసభ్యులు, ముగ్గురు శాసనమండలి సభ్యులు, ఒక పార్లమెంటు సభ్యుడు వైయస్సాఆర్ కాంగ్రెసు పార్టీ కార్యాలయంలో భేటీ అయ్యారు.

ఈ భేటీలో రాజీనామా చేయాలని నిర్ణయించుకున్నారు. భేటీకి హాజరైన వారితో పాటు మరికొందరు సైతం రాజీనామాలు చేయడానికి సిద్ధంగా ఉన్నట్లు చెబుతున్నారు. మరికొందరు నేతలు తమ తమ కార్యక్రమాల వల్ల భేటీకి హాజరు కానప్పటికీ రాజీనామాలు చేయడానికి మాత్రం కలిసి వస్తామని చెప్పారని వైయస్సార్సీ పార్టీ నేతలు చెబుతున్నారు. కాగా వీరంతా ఆదివారం సాయంత్రం లేదా సోమవారం తమ రాజీనామాలను స్పీకర్‌కు ఇవ్వనున్నారు. భేటీలో చాలామంది రాజీనామాలకు మొగ్గుచూపగా, కొందరు రాజీనామాలు వద్దని సూచించినట్లుగా తెలుస్తోంది. అయితే ఆఖరుగా రాజీనామాలకే మొగ్గు చూపారు. రాజీనామా చేసే వారి సంఖ్య 30 వరకు ఉండవచ్చని తెలుస్తోంది.

Published On August 21, 2011