వైయస్ జగన్ నేతల నుండి సిగ్గు తెచ్చుకోవాలి: కెటిఆర్

By Srinivas

Published: Sunday, August 21, 2011, 18:15 [IST]

హైదరాబాద్: వైయస్సాఆర్సీ పార్టీ అధినేత వైయస్ జగన్మోహన్ రెడ్డి వర్గం ప్రజాప్రతినిధులను చూసి తెలంగాణ ప్రాంత ప్రజాప్రతినిధులు సిగ్గు తెచ్చుకోవాలని తెలంగాణ రాష్ట్ర సమితి సిరిసిల్ల శాసనసభ్యుడు కె తారక రామారావు ఆదివారం ధ్వజమెత్తారు. ఒక్క వ్యక్తి కోసం అంతమంది ఎమ్మెల్యేలు రాజీనామా చేస్తే నాలుగు కోట్ల ప్రజల కోసం తెలంగాణ ప్రజా ప్రతినిధులు రాజీనామాలు చేయడానికి ముందుకు రాక పోవడం బాధాకరం అన్నారు. కాంగ్రెసుకు జగన్ అవినీతి ఇప్పుడు గుర్తుకు వచ్చిందా అని ఆయన ప్రశ్నించారు. జగన్ దోషి అని తేలితే అందులో కాంగ్రెసుకు భాగస్వామ్యం ఉంటుందని అన్నారు.

అవినీతిపై 2004 నుంచి కాంగ్రెసు పార్టీ కళ్లు మూసుకుందా అని ప్రశ్నించారు. అవినీతికి కేరాఫ్ అడ్రస్‌గా మారిన తెలుగుదేశం పార్టీ అధినేత నారా చంద్రబాబు నాయుడు అవినీతి వ్యతిరేక ఉద్యమంలో పాల్గొనడం సిగ్గుచేటు అన్నారు. దేశంలో అత్యంత అవినీతిపరుడు చంద్రబాబు అని తెహెల్కా బయట పెట్టిన విషయం ఆయనకు గుర్తు లేదా అని ఎద్దేవా చేశారు.

Published On August 21, 2011