జగన్ వర్గ రాజీనామాలు, పావులు కదుపుతున్న కెసిఆర్

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన శాసనసభ్యులు రాజీనామాలు చేసిన నేపథ్యంలో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు పావులు కదుపుతున్నట్లు తెలుస్తోంది. తెలంగాణ శాసనసభ్యుల చేత రాజీనామాలు చేయించి తెలంగాణ రాష్ట్ర సాధనకు మార్గం సుగమం చేసుకోవాలనే ఎత్తుగడలో ఆయన ఉన్నట్లు వార్తలు వస్తున్నాయి. తెరాస నాయకులు ఇప్పటికే కార్యాచరణకు ఒడిగట్టారు. కెటి రామారావు వంటి తెరాస నాయకులు కాంగ్రెసు తెలంగాణ ప్రాంత శాసనసభ్యులను తమ ప్రకటనల ద్వారా రెచ్చగొడుతున్నారు. ఒక్క వ్యక్తి జగన్ కోసం 30 మంది రాజీనామాలు చేస్తే తెలంగాణ కోసం రాజీనామాలు చేయడానికి తెలంగాణ ప్రాంత శాసనసభ్యులు వెనకాడుతున్నారని ఆయన విమర్శించారు.

తాజాగా, తెలంగాణ రాజకీయ జెఎసి చైర్మన్ కోదండరామ్ కూడా కాంగ్రెసు తెలంగాణ ప్రాంత శాసనసభ్యులపై ఒత్తిడి పెంచేందుకు సిద్ధపడ్డారు. ఇప్పటి రాజకీయ సంక్షోభం తెలంగాణ సాధనకు కలిసి వస్తుందని, తెలంగాణ కోసం తెలంగాణ ప్రాంత శానససభ్యులు రాజీనామాలు చేయాలని ఆయన అన్నారు. రాజీనామాలు చేస్తేనే సకల జనుల సమ్మెకు మద్దతు తెలిపే హక్కు ఉంటుందని ఆయన అన్నారు. జగన్‌తో కలిసి ప్రభుత్వాన్ని పడగొట్టాలని కెసిఆర్ ప్రయత్నిస్తున్నారని కాంగ్రెసు వైపు నుంచి విమర్శలు కూడా వస్తున్నాయి. దీన్ని బట్టి కెసిఆర్ తనకు అనుకూలంగా పరిస్థితిని మలుచుకునేందుకు సిద్ధపడుతున్నారు. ఈ రకంగా ఆయన మళ్లీ ఎన్నికలను కూడా ఆహ్వానిస్తున్నారు.

English summary

It is said that TRS president K chandrasekhar rao is planning topple Kirankuamar Reddy government.