వైయస్ జగన్ బలం తగ్గే అవకాశం: టిజి వెంకటేష్

By Srinivas

Published: Tuesday, August 23, 2011, 14:42 [IST]

కర్నూలు‌: వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం శాసనసభ్యుల రాజీనామాలు స్పీకరు ఆమోదించి మళ్లీ ఎన్నికలకు వెళితే జగన్‌కు తిరిగి అంత సంఖ్యాబలం ఉండక పోవచ్చునని మంత్రి టిజి వెంకటేష్ మంగళవారం కర్నూలు జిల్లాలో అన్నారు. తమ రాజీనామాలను స్పీకర్ ఆమోదించరని జగన్ వర్గం ఎమ్మెల్యేలకు తెలుసునని అందుకే వారు రాజీనామాలు చేశారన్నారు.

వారి చేసిన రాజీనామాలు చెల్లవన్నారు. రాజీనామాలు చేసినప్పటికీ ప్రభుత్వానికి ఎలాంటి ఢోకా లేదన్నారు. వారు రాజీనామాలు చేసి ఎన్నికలకు వెళ్లినా ప్రభుత్వానికి నష్టం లేదన్నారు. మీడియా దృష్టిని ఆకర్షించడానికే ఎమ్మెల్యేలు రాజీనామా డ్రామాలు ఆఢుతున్నారని అన్నారు. ఒకవేళ స్పీకరు వారి రాజీనామాలు ఆమోదించినా ఉప ఎన్నికలు వచ్చి కోట్లాది రూపాయల ప్రజాధనం వృథా అవుతుందన్నారు.

Published On August 23, 2011