అవినీతిపై బాబుకు నారాయణ అండ, జగన్‌పై దాడి

By Srinivas

Published: Thursday, August 25, 2011, 11:31 [IST]

విజయవాడ: అవినీతి అంశంపై సిబిఐ రాష్ట్ర కార్యదర్శి నారాయణ తెలుగుదేశం పార్టీ అధినేత నారా చంద్రబాబు నాయుడుకు మద్దతుగా మాట్లాడుతూ, వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డిపై ఎదురు దాడికి దిగారు. చంద్రబాబు అవినీతిపై కాంగ్రెసు, వైయస్సార్సీ పార్టీ నేతలు ఇప్పుడు ప్రశ్నించడాన్ని ఆయన తప్పు పట్టారు. ఆరేళ్లుగా అధికారంలో ఉన్న కాంగ్రెసు పార్టీ చంద్రబాబుపై వచ్చిన అవినీతి ఆరోపణలపై విచారణ జరపకుండా ఏం చేశారని ప్రశ్నించారు. అధికారంలో ఉన్నది కాంగ్రెసు పార్టీయే కాబట్టి విచారణ జరిపించాలన్నారు.

వైయస్ జగన్ సిబిఐ విచారణకు సహకరించి తన నిజాయితీ నిరూపించుకోవాలన్నారు. నిజాయితీ నిరూపించుకోవాల్సిన బాధ్యత ఆయనపై ఉందన్నారు. అవినీతిని కప్పి పుచ్చుకోవడానికి జగన్ వర్గం శాసనసభ్యులు రాజీనామా ఆస్త్రాలు ప్రయోగించారని ఆరోపించారు. మంత్రివర్గం నిర్ణయాల అమలులో రాజకీయ అవినీతి ఉందని ఆయన ఆరోపించారు. కాంగ్రెసులో ప్రజారాజ్యం పార్టీ విలీనం వినాయక నిమజ్జనం వంటిదని ఆయన అభిప్రాయపడ్డారు.

Published On August 25, 2011