చంద్రబాబు బంధువు ఇంట్లోనూ సిబిఐ సోదాలు: అంబటి

By Srinivas

Published: Sunday, August 28, 2011, 14:47 [IST]

హైదరాబాద్: తెలుగుదేశం పార్టీ అధినేత, మాజీ ముఖ్యమంత్రి నారా చంద్రబాబు నాయుడు దగ్గరి బంధువుల పైనా సిబిఐ దాడులు జరుగుతున్నాయని వైయస్సార్ కాంగ్రెసు పార్టీ అధికార ప్రతినిధి అంబటి రాంబాబు ఆదివారం ఆరోపించారు. చంద్రబాబుకు దగ్గరి బంధువు అయిన కోనేరు ప్రసాదు ఆస్తులపైనా సిబిఐ దాడులు జరుగుతున్నాయని ఆయన అన్నారు. చంద్రబాబు చేస్తున్న అవినీతి వ్యతిరేక నీతి వ్యాఖ్యలు చూసి ప్రజలు ఆశ్చర్య పోతున్నారన్నారు. బాబుకు రెండు ఎకరాల భూమి నుండి వెయ్యి కోట్లు ఎలా వచ్చాయని, అది అవినీతి కాదా అని ప్రశ్నించారు.

తన హయాంలోనే ఎమ్మార్‌కు అనుమతులిచ్చానని రాష్ట్ర ఉన్నత న్యాయస్థానం హైకోర్టుకు చంద్రబాబు లేఖ రాయాలని డిమాండ్ చేశారు. ఎమ్మార్‌లో తన బండారం బయట పడుతుందనే ఆయన మిన్నకుండి పోయారన్నారు. వైయస్ రాజశేఖర రెడ్డి కుటుంబాన్ని వేధిస్తున్న దుష్ట శక్తులను తరిమి కొట్టాలని హనుమాన్ జంక్షన్‌లోని ఆంజనేయస్వామి ఆలయంలో పూజలు నిర్వహించినట్టు చెప్పారు.

Published On August 28, 2011