కోదండరామ్ పై కాదు చంద్రబాబుపై 420 కేసు: కెటిఆర్

By Srinivas

Published: Tuesday, August 30, 2011, 16:06 [IST]

హైదరాబాద్: తెలంగాణ తెలుగుదేశం పార్టీ ప్రజా ప్రతినిధులు సభా హక్కుల ఉల్లంఘన నోటీసు రాజకీయ ఐక్య కార్యాచరణ సమితి చైర్మన్ ప్రొఫెసర్ కోదండరామ్ పై కాకుండా ఆ పార్టీ అధినేత నారా చంద్రబాబు నాయుడపై ఇవ్వాలని తెలంగాణ రాష్ట్ర సమితి సిరిసిల్ల శాసనసభ్యుడు కల్వకుంట్ల తారక రామారావు మంగళవారం డిమాండ్ చేశారు. తెలంగాణపై మాట తప్పిన బాబుపై 420 కేసు పెట్టాలన్నారు. కోదండరామ్ పై కేసు పెడితే ఆ పార్టీ నేతలకు తెలంగాణలో పరాభవం తప్పదన్నారు. కాంగ్రెసు పార్టీని విషవృక్షం అన్న చంద్రబాబు నాయుడు ప్రభుత్వాన్ని ఎందుకు కూల్చడం లేదని ప్రశ్నించారు.

చిత్తశుద్ధి ఉంటే బాబు వెంటనే అవిశ్వాస తీర్మానం పెట్టాలన్నారు. తెలంగాణ తెలుగుదేశం పార్టీ నేతలు చంద్రబాబు డైరెక్షన్‌లో పని చేస్తున్నారన్నారు. తెలంగాణ ద్రోహులను నిలదీయటం తప్పా అని ప్రశ్నించారు. టిడిపి అంటే తెగువలేని దద్దమ్మల పార్టీ అని మరోసారి నిరూపించుకుందన్నారు. వేగంగా మారుతున్న రాష్ట్ర రాజకీయ పరిణామాలు పరిశీలిస్తున్నామన్నారు. అవసరమైనప్పుడు తెలంగాణ దెబ్బ రుచి చూపిస్తామనన్నారు. తెలంగాణ మంత్రులు దొంగల్లా విధుల్లో చేరుతున్నారని విమర్శించారు.

Published On August 30, 2011