ఎమ్మెల్యేల రాజీనామాలు, జగన్ అరెస్టుకు నిరీక్షణ

By Pratap

Published: Tuesday, August 30, 2011, 9:26 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వర్గానికి చెందిన శాసనసభ్యుల రాజీనామాలను శాసనసభ స్పీకర్ నాదెండ్ల మనోహర్ పరిశీలిస్తున్నప్పటికీ ఆమోదం ఇప్పుడిప్పుడే జరగదని భావిస్తున్నారు. తన పని తాను చేసుకుపోతున్న పద్ధతిలో స్పీకర్ వ్యవహరిస్తున్నారు. కాగా, వైయస్ జగన్ అరెస్టు దాకా రాజీనామాలు ఆమోదం పొందకుండా చూడాలనే ఎత్తుగడలో కాంగ్రెసు నాయకత్వం ఉన్నట్లు చెబుతున్నారని ఓ ఆంగ్ల దినపత్రిక రాసింది. అరెస్టయితే కొన్ని నెలలైనా జగన్ జైలులో ఉండాల్సి వస్తుందని, ఈలోగా జగన్ కోసం రాజీనామా చేసినవారిలో కొంత మంది వెనక్కి రావచ్చునని కాంగ్రెసు నాయకత్వం భావిస్తోందని ఆ వార్తాకథనం సారాంశం.

రాజీనామా చేసిన 26 మంది శాసనసభ్యుల్లో ఐదుగురు ఇప్పటికే పిసిసి అధ్యక్షుడు బొత్స సత్యనారాయణతో సంప్రదింపులు జరుపుతున్నట్లు ఆ వార్తాపత్రిక తెలిపింది. వెనక్కి రావడానికి తమకు కొంత సమయం కావాలని, ఈలోగా రాజీనామాలు ఆమోదించవద్దని వారు చెప్పినట్లు సమాచారం. తమ నియోజకవర్గాల్లోని ప్రజల ఒత్తిడి మేరకే తాము రాజీనామాలు చేశామని, కొంత సమయం ఇస్తే తమ కార్యకర్తలకు నచ్చజెప్పుకుంటామని వారు బొత్స అన్నట్లు ఆ పత్రిక రాసింది.

Published On August 30, 2011