ఎమ్మెల్సీకి రోశయ్య రాజీనామా: రేసులో డి శ్రీనివాస్

By Srinivas

Published: Tuesday, August 30, 2011, 14:35 [IST]

హైదరాబాద్: తమిళనాడు గవర్నర్‌గా నియమితులు కావడంతో మాజీ ముఖ్యమంత్రి రోశయ్య శాసనమండలి సభ్యత్వానికి మంగళవారం రాజీనామా చేశారు. శాసనమండలి చైర్మన్ చక్రపాణికి మధ్యాహ్నం తన రాజీనామా లేఖను రోశయ్య అందించారు. బుధవారం సాయంత్రం రోశయ్య తమిళనాడు గవర్నర్‌గా రాజీనామా చేయనున్నారు. కాగా రోశయ్య రాజీనామాతో ఖాళీ అయిన శాసనమండలి రేసులో కాంగ్రెసు నుండి చాలామంది ఉన్నారు. అదీగాక ఇటీవల ప్రజారాజ్యం పార్టీ అధికారికంగా విలీనం కావడంతో ఆ పార్టీ నేతలూ ఆశలు పెట్టుకున్నట్టుగా కనిపిస్తోంది. రోశయ్యను తమిళనాడు గవర్నర్‌గా నియమిస్తూ ఉత్తర్వులు జారీ అయినప్పటి నుండి పార్టీలోని పలువురు సీనియర్లు ఆ పదవి కోసం తమ వంతు ప్రయత్నాలు చేస్తున్నారు.

సామాజిక, తెలంగాణ ఉద్యమాల నేపథ్యంలో ఈ సీటు భర్తీ కోసం అధిష్టానం బాగా ఆలోచించి నిర్ణయం తీసుకునే అవకాశం ఉంది. శాసనమండలిలో ఇప్పటి వరకు బిసిలలోని చేనేత వర్గానికి సరైన ప్రాధాన్యత ఇవ్వలేదని ఆ వర్గాల్లో అసంతృప్తి ఉంది. దీంతో ఆ వర్గం నుండి బూదాటి రాధాకృష్ణయ్యను ఎంపిక చేయవచ్చుననే ఊహాగానాలు వినిపిస్తున్నాయి. అంతేకాకుండా రోశయ్య ఆంధ్రా ప్రాంతం వ్యక్తి. రాధాకృష్ణయ్య సైతం శ్రీ పొట్టి శ్రీరాములు నెల్లూరు జిల్లాకు చెందిన వ్యక్తి. ఇద్దరూ ఒకే ప్రాంతానికి చెందిన వ్యక్తి కావడంతో రాధాకృష్ణయ్య వైపే పార్టీ మొగ్గే అవకాశాలు ఉన్నట్టుగా కనిపిస్తోంది.

తెలంగాణ ఉద్యమం తీవ్రరూపం దాల్చిన ఈ సమయంలో తెలంగాణ వారికి ఇచ్చే అవకాశాలనూ కొట్టి పారేయలేము. మాజీ పిసిసి అధ్యక్షుడు ధర్మపురి శ్రీనివాస్ పేరునూ అధిష్టానం పరిశీలిస్తున్నట్లుగా తెలుస్తోంది. తెలంగాణ ఉద్యమకారులను చల్లబర్చడానికి ఇటీవల దళిత వర్గానికి చెందిన దామోదర రాజనర్సింహకు ఉప ముఖ్యమంత్రి పదవి కట్టబెట్టిన విషయం తెలిసిందే. అలాగే బిసి వర్గానికి చెందిన శ్రీనివాస్‌కు ఇచ్చే అవకాశాలు బాగానే ఉన్నాయి. కిష్టారెడ్డి, వకుళాభరణం కృష్ణమోహన్ రావు తదితరుల పేర్లనూ అధిష్టానం పరిశీలిస్తున్నట్లుగా తెలుస్తోంది. అయితే అత్యధికంగా ఉన్న బిసి ఓట్లు టిడిపి, జగన్ వైపు మళ్లకుండా చూసేందుకు ఆ వర్గాలకే అధిష్టానం ప్రాధాన్యత ఇచ్చే అవకాశాలు ఉన్నాయి.

Published On August 30, 2011