రాజీనామాలు చేద్దాం: జానా రెడ్డితో టిటిడిపి నేతలు

By Pratap

Published: Tuesday, August 30, 2011, 12:24 [IST]

హైదరాబాద్: తెలంగాణ రాష్ట్ర సాధన కోసం మళ్లీ రాజీనామాలు చేద్దామని తెలుగుదేశం తెలంగాణ ఫోరం నేతలు మంగళవారం తెలంగాణ ప్రాంతానికి చెందిన మంత్రి కె. జానారెడ్డిని కోరారు. ఎర్రబెల్లి దయాకర్ రావు, మోత్కుపల్లి నర్సింహులు తదితర తెలుగుదేశం తెలంగాణ ఫోరం నాయకులు జానారెడ్డిని కలిశారు. వచ్చే నెల 5వ తేదీలోగా రాజీనామాలు చేయడానికి కలిసి రావాలని వారు కాంగ్రెసు శాసనసభ్యులకు సూచించారు. తెలంగాణ కోసం రాజీనామాలు చేసిన తెలంగాణ శాసనసభ్యుల రాజీనామాలను స్పీకర్ నాదెండ్ల మనోహర్ తిరస్కరించిన విషయం తెలిసిందే. ఆ తర్వాత తెలంగాణ రాష్ట్ర సమితి (తెరాస) శాసనసభ్యులు, నాగం జనార్దన్ రెడ్డి బృందం శానససభ్యులు మళ్లీ రాజీనామాలు చేశారు.

కాంగ్రెసు, తెలుగుదేశం తెలంగాణ ప్రాంత శానససభ్యులు మాత్రం మళ్లీ రాజీనామాలు చేయలేదు. అందరం కలిసి రాజీనామాలు చేస్తేనే రాజకీయ సంక్షోభం తలెత్తుతుందని, అలాంటి పరిస్థితి వస్తేనే తెలంగాణ రాష్ట్ర ఏర్పాటు సాధ్యమవుతుందని తెలుగుదేశం తెలంగాణ ఫోరం నాయకులు జానా రెడ్డితో చెప్పారు. తమ పార్టీకి చెందిన శాసనసభ్యులు మాత్రమే రాజీనామాలు చేయడం వల్ల ఉప ఎన్నికలు మాత్రమే వస్తాయని, దానివల్ల ఫలితం ఉండదని వారన్నారు. రాజీనామాల వల్ల ఎన్నికలు వస్తే పార్టీ జెండాలను పక్కన పెట్టి కామన్ సింబల్‌పై పోటీ చేద్దామని కూడా వారు సూచించారు.

Published On August 30, 2011